Коронавирус юкпалы маразы таралып барувы ман байланыста коьбисинше эм аьли уьшин ялгыз бир сога карсылык этуьв йолы бар экени аян коьринеди. Ол, элбетте, вакцинация.

Ямагат пан бирге солай ок республикадынъ киши эм орта предпринимательство ваькиллери де бу яваплы кампанияга белсенли урынып баслаятыр. Ондайлардынъ бириси – Ногай районынынъ Терекли-Мектеб авылынынъ «Батыр» деген хозяйстволык товарлар туькенининъ иеси Батырхан Бийбулатов. Ол оьзи, онынъ хатыны эм хозяйстволык товарлар туькенининъ баьри де куллыкшылары янъыларда вакцинациядынъ биринши кезегин оьткенлер.
– Меним оьзим, аьелим эм бизим «Батыр» деген туькенимиздинъ кишкей татым коллективининъ коронавируска карсы прививка эттируьвининъ бас себеби – ол Дагестан Роспотребнадзорынынъ республикадынъ савдалык тармагында куллык этетаганлардынъ баьриси де COVID-19 маразына карсы вакцинация оьтпеге борышлы экени акында шыгарган токтасы.
Мен, бириншилей, юкпалы авырувынынъ таралувы ман байланыста туьзилген аьллерди анълап, Роспотребнадзор, ерли власть органларынынъ, савлык саклав учреждениелер етекшилерининъ шакырувларына бойсындым, неге десе бизнес уьшин карантин деген зат – уьйкен оравлык. Экиншилей, уьйдегилерим, оьзим мен куллык этетаган аьдемлер авырыганы биревге де керек тувыл. Аьр ким де ислемеге эм оьз аьеллерин сакламага керек ше. Уьшиншилей, баьри де предпринимательлерге, оьз ердеслериме эмишлик йорайман, авырыманъыз эм прививка эттирмеге шалысынъыз, – деген яс предприниматель-авылдасымыз Батырхан Бийбулатов.
М.Юнусов.