Ногай районында аьлиги заманда авыл хозяйстволык аьрекети мен каьр шегетаган хыйлы сулыплы СПК-лар, эгинши-фермер эм байыр ярдамшы хозяйстволары бар. Олар эндигиси алдынгы совхозларды эм колхозларды толы кепте авыстырганлар. Район фермерлери койлар эм тувар, бийдай, ясылша, бакша, пишен-ем культураларын оьстиредилер.

Сондай белсенли фермерлер арасында Куьнбатар авылдан «Мансуров Фазиль» деп аталган эгинши-фермер хозяйствосынынъ басшысы Фазиль Мансуровты атамага болады. Ол районда бийдай оьстиретаган эгиншилердинъ бириси деп саналады. Фазиль аьли 2013-нши йылдан бери сондай аьрекетин юритеди. Ол оьзиндеги 600 гектар ерлерине, соны ман бирге тагы да 700 гектарды арендага алып, соларда бийдай оьстиреди. Буьгуьнлерде де яс фермер оьз ерлеринде куьзлик бийдай урлыгын шашып турады.
– Оьстирилген онъысты Ставрополь крайындагы ун шыгаратаган терменлерге аькетип сатаман, неге десе мен кырларымда элиталы урлыклы бийдай шашаман. Сол бийдайдан урлык орынына меннен баска фермерлер де сатып аладылар, – дейди Фазиль Мансуров.
Авыл фермерининъ оьзининъ «МТЗ-892», «К-700» маркалы тракторлары, сабанлары, культиваторлары эм сондай баска авыл хозяйстволык техникасы бар. Онынъ берк негизли хозяйствосында солай ок ана койлар, тувар мал да асылланады. Ол мунда сав аьели мен ислегенге, Оькиметтен 9 миллион 970 мынъ маьнеттинъ грантын да алган.
Бурынгы атайларымыздан «Алтын-куьмис тас экен, арпа-бийдай ас экен» деген соьзлер калыпты. Аслык йыюв шагында яс фермердинъ колынынъ увысында алтын туьси мен яркыраган бийдайды коьргенде, ата юртымыздынъ алтыны – ол Фазиль Мансуровтай авыл хозяйство куллыкшылары экенин анълайсынъ.
М.Ханов.
Суьвретте: фермер Фазиль Мансуров.