Дагестан аьвелги тарихи эм бай маданияты болган республикалардынъ бириси болады. Дагестан тек тавлардынъ эли болып калмай, бас деп, ол коьп санлы халкларынынъ эм тиллерининъ эли болады. Аьр бир халктынъ оьзининъ оьрметли авыллары бар. Сол авыллар биреви юннен кийгизлер басувы ман, экиншиси йыныслы койларды оьстируьв мен, агаштан, тастан оюв усталары ман белгили, уьшиншисинде калшелер тогыйдылар, ярасык явлыклар согадылар, баскалары юзим, алма оьстируьви мен, оьз уста биювшилери мен белгили. Аьр бир авылдынъ оьзининъ таьвесилмес аьвелгиси эм бай тарихи, ярык буьгуьнгиси эм сенимли келеектегиси бар.
Дагестаннынъ савлай районларында, сонынъ ишинде Ногай районынынъ, маданият уьйлеринде, билимлендируьв ошакларында да, мектеблерден алып балалар бавына дейим Дагестан халкларынынъ бирлесуьв куьнине багысланып туьрли шаралар озгарылдылар. Айтпага, Ногай районынынъ Д.Шихмурзаев атындагы орта мектебинде халклардынъ бирлесуьв куьнине багысланган шаралар юмалыгы уйгынланып оьтти. Шаралардынъ озгарылувында мектеб окытувшылары, класс етекшилери, китапхана куллыкшылары, 2-нши класстан алып 9-ншы класска дейим окувшылар ортакшылык эттилер. Кырк кийик айынынъ 8-нши куьниннен алып 14-нши куьнине дейим, мектеб бойынша «Мен – россиянлы, мен – дагестанлы» деген видеоролиги, китапхана куллыкшылары ман «Меним Дагестаным», «Меним тувган ерим» деген китаплер, ясалган суьвретлер выставкалары, «Меним Дагестаным» деген ятлавлар окувшыларынынъ ярысы, «Биз бирге дослык пан куватлымыз» деген темага сочинениелер ярыслары, «Меним тувган ерим», «Бизим куьшимиз – бирликте» деген класс саьатлери уйгынланып озгарылдылар. Айтпага, мектеб бойынша оьткен «Меним Дагестаным» деген ятлавды яттан окув ярысынынъ баслангыш куьбинде Сабрина Абдулгапарова 2-нши орынга, Сакинат Эсиргепова 3-нши орынга, 2-нши куьп бойынша 5-нши класс окувшысы Суюмбийке Динисламова 1-нши орынга, Амина Баймурзаева 2-нши орынга, 6-ншы класс окувшысы Эмир Баймурзаев 3-нши орынга тийисли этилдилер.
Кырк кийик айынынъ 14-нши куьнинде авыл маданият уьйинде Дагестан халкларынынъ бирлесуьв куьнине багысланган байрам концерти де уйгынланып оьтти. 2-нши класстан алып 9-ншы класска дейим окувшылар миллет кийимлеринде туьрли биювлерин бийидилер, йыр йырладылар, ятлавлар айттылар, спектакльден кесегин сахнага шыгарып коьрсеттилер, туьрли дагестан халкларынынъ асларын аьзирледилер.
Соьйтип, Дагестан халкларынынъ бирлесуьв куьнине багысланган шара йылы эм йогары коьнъилде оьтти.
Г.Нурдинова.
Суьвретте: шара катнасувшылары.
