Уьстимиздеги йылдынъ тамбыз айынынъ 16-17-нши куьнлеринде элимиздинъ бас каласы Москвада «Этнокультуралык сектордынъ тебентели оьрленуьви» деген III Савлайроссиялык конференциясы уйгынланып оьтти. Шарада элимиздинъ туьрли регионларыннан ети юзден артык аьдемлер ортакшылык эттилер. Конференцияда Янъы Уренгой каласыннан «Ногай Эл» ногай миллет маданият автономиясынынъ председатели, ямагат аьрекетшиси, краевед, Россия Журналистлер союзынынъ агзасы Хаирбек Алакаев катнасты. Ол конференциядынъ барысында йыйылганларды «Енъуьв баьрисине де бир» деген ямагат организациясынынъ проекти мен таныстырды. Сол проект миллет катнасувлары бойынша тармагындагы энъ ийги практикалар йыйылысына киргени эм енъуьвши болганы белгиленди.

– Мен Янъы Уренгой каласынынъ «Ногай Эл» миллет-маданият автономиясынынъ, Ямал-Ненец автономия округынынъ ногай ямагатынынъ эм баьри де яшавшыларынынъ, солай болып, Россия ногайларынынъ ФНКА-нынъ атыннан конференциядынъ уйгынлавшыларына, катнасувшыларына эм конакларына саламымды беремен. 2020-ншы йылда бизим организациямыздынъ «Енъуьв баьрисине де бир» деген проекти округ бойынша конкурсынынъ енъуьвшиси болды.
Проект Уллы Аталык согысындагы Енъуьвдинъ 75 йыллыгына багысланган эди, ама коронавирус маразынынъ яйылувы ман байланыста биз оны каладынъ администрациясы ман, маданият отанлары ман эм ямагатшылык организациялар ман биргелесип, 2021-нши йылда озгардык, – деди шарада Хаирбек Алакаев.
Айтып озайык, сол проекттинъ авторы «Ногай Эл» ямагат организациясынынъ белсенли катнасувшылары онъайлы исти яшавга шыгарувда уьйкен куллыгын юриттилер.
2021-нши йылдынъ коькек айынынъ 30-ншы куьнинде проект бойынша Янъы Уренгой каласынынъ Миллет маданият орталыгынынъ залында концерт коьрсетилди. Шарада ногай, башкир, шешен, чуваш, татар халкларынынъ миллет маданият автономияларынынъ ваькиллери, солай болып, каладынъ кайбир ямагат биригуьвлери эм аьскершилик-патриотлык клублары, Янъы Уренгой каласынынъ яратувшылык коллективлери катнастылар. Концертте орталык клуб тармагынынъ артистлери, студентлер эм балалардан баска, шарага шакырылган йырлавшылар, олардынъ арасында Карашай-Шеркеш Республикасынынъ ат казанган артисти Майя Рамазанова да оьз оьнерлери мен боьлистилер. Сахнада йырлар туьрли халклар тиллеринде йырланса да, каравшылар оларды йылы карс кагувы ман хош алдылар. «Дайымлык оты», «Коьк явлык» йырлары ногай тилинде, «В землянке» деген йыры кумык, «Смуглянка» йыры татар тиллеринде йырландылар. Шара катнасувшылары «Белорус вокзалы» деген кинофильмнен йырларын да ногай, чуваш, орыс тиллеринде оьнерли йырлап эситтирдилер. Янъы Уренгой каласыннан «Руслан» деген балалар бавынынъ тербияланувшылары да «Уьш танкистлери» деген йырын ярык эм сезимли кепте алты тиллеринде йырладылар. Аьр бир йыр хореографиялык коьрсетуьвлери мен ярасыкланган эди. Онынъ катнасувшылары «Горянка» деген кавказ йырларынынъ ансамбли, «Разгуляй» деген халк биюв ансамбли, «Сияние» биюв ансамбли, «Элегия» деген Янъы Уренгой каласындагы коьп кеспили колледжининъ хореографиялык коллективи болдылар.
«Шоьл тавысы» газетасынынъ редакциясы енъуьвши – «Ногай Эл» деген Ногай миллет маданият автономиясын эм онынъ председатели, ногай халкынынъ патриоты Хаирбек Алакаевти савлайроссиялык конкурс енъуьвшиси болувы ман ак юректен кутлайды. Автономия агзаларына берк ден савлыкты, олардынъ аьеллерине онъайлыкты сагынады.
Суьвретте: шарадан коьринис.