Дагестанда озган юма сонъгы куьн Махачкала аэропортында бокс бойынша олимпиада чемпионы Альберт Батыргазиевти шатлыклы аьлде карсы алдылар. Алдынгы куьн Альберт Батыргазиевти Москва каласында РФ Коршалав министерствосында хош алдылар. Министр Сергей Шойгу олимпиада чемпионын енъуьв мен кутлады эм 2-нши дережели «За воинскую доблесть» медалин тапшырды, физический культура эм спорт тармагына уьйкен байыр уьлис косканы уьшин разылыгын билдирди.
Дагестан Республикасында Альберт Батыргазиевтинъ ата-анасы яшайдылар. Самолеттан туьскенде ок спортсменди Дагестан Республикасынынъ Оькиметининъ вице-премьери Муслим Телякавов, республикадынъ спорт министри Сажид Сажидов, Ногай эм Бабаюрт районларынынъ аькимбаслары, чемпионнынъ атасы карсы алдылар эм алтын медаль мен кутладылар. Аэропорттан шыккан ерде тынышсызланып, Альбертти анасы карап туры эди.
Альберт Батыргазиевти хош алмага аэропортка мынълаган аьдемлер келгенлер. Олар бизим Дагестан Республикамыздан, конъысы регионлардан – Карашай-Шеркеш, Шешен Республикаларыннан, Астрахань областиннен, Ставрополь крайыннан, Москва эм Ростов каласыннан. Сондай йылы йолыгыстан яс олимпиада чемпионы коьзясларын ясырып болмады.
– Сондай куьшли коьтергишлевди сезгенде, анълайсынъ, сенинъ уьшин кыйналадылар эм енъмеге де тынышлы болады. Мен бек суьйинемен, меним енъуьвим коьплеген аьдемлерди бирлестирди. Мен баьринъизге де суьйинемен, савболынъыз мени соьйтип хош алганынъызга, мага маьне бергенинъизге. Алдыда да сизди аьли енъуьвлерим мен кувантпага шалысарман, – деп айтты Альберт Батыргазиев.
Дагестан Республикасынынъ етекшилеви атыннан чемпионды спорт министри кутлады.
– Мен тек Альбертти тувыл, савлай коьп миллетли Дагестанды бу енъуьв мен кутлайман. Аьли де бир дагестан халкында оьз чемпионы бар эм мен сенемен, бу медаль ызгы тувыл. Алдыда тагы да Олимпиада ойынлары бар, Альберт Токиода етискен уьстинлигин сонда да коьрсетер. Биз ога аьли де коьп енъуьвлер эм берк ден савлык йораймыз, – деди С.Сажидов.
Халкымыздынъ увылын Ногай район аькимбасы Мухтарбий Аджеков, Бабаюрт район аькимбасы Даниял Исламов, солай ок Россиядынъ туьрли регионларынынъ ваькиллери кутладылар.
Альберт Батыргазиевтинъ спорт баьтирлиги «Имам Шамиль» алтын ордени мен белгиленген, савгады «Шамиль фонды» савлайдуныялык ямагатынынъ президенти Алиасхаб Хархачаев тапшырды. Баьри йыйылганларга оьз разылыгын чемпионнынъ атасы Ханбулат Батыргазиев билдирди.
– Биз бек куванамыз, сиз буьгуьн бизим суьйинишимизди боьлисип турысыз. Савболынъыз. Бу енъуьв баьримизге де ортак болады, – деди ол. Сонъ Альберт Батыргазиевтинъ сыйына концерт программасы коьрсетилди, чемпион лезгинка биювинде майданда айланды.
Сол куьн ДР Аькимбасынынъ кесек заманга куллыгын юритуьвши Сергей Меликов чемпион ман йолыгысты.
Альберт Батыргазиевтинъ кишкей Аталыгы Бабаюрт районынынъ Геметоьбе авылында Олимпиада чемпионынынъ сыйына шатлыклы шаралар оьтти.
Эльмира Кожаева, «Шоьл тавысы» республикалык газетасынынъ бас редакторы.
