Окытувшы аьр бир окувшысынынъ яшавында маьнели орынды тутып келеди. Онынъ колында билим, тербия алган окувшылары яшавда насихатшысынынъ коьрсеткен йолы ман адаспай тувра барадылар. Сондай абырайлы окытувшылардынъ бириси – Улангерек Байрашевна Ягьяева. Бай сулыплы окытувшы мине 50 йылдан артык Кизляр районынынъ Крайновка авыл орта мектебинде орыс тил эм адабиатыннан дерисин берип келеди.
Улангерек Байрашевна Кизляр районынынъ Боранбай авылында 1951-нши йылдынъ курал айынынъ 18-нши куьнинде Уллы Енъуьв Парадынынъ катнасувшысы, Германиядынъ бас каласы Берлинди алувда ортакшылык эткен Байраш эм Былкыстынъ аьелинде тувып оьскен. Окытувшы ата-анасынынъ акында хабарлаганда, олардынъ акында юректе уьйкен йылувлык пан эскереди, согыс ветераны атасынынъ согыста коьрсеткен йигитликлери акында оьктемсип хабарлайды.
Улангерек Байрашевнадынъ педагогикалык кесписин сайлавында, бактысында кишкей заманда онынъ орыс тил эм адабиатыннан окыткан окытувшысы Л.Дорофеева, класс етекшиси Г.Богомолова ис аьрекетин уьлгили юритуьвлери мен маьнели ызды калдырдылар. Бала шагыннан алып билимге ымтылысы, окытувшы болаякпан деген мырады бар кыз мектебте, оннан сонъ Буйнакск каласындагы педучилищеде, коьп заман кетпей, Дагестан патшалык педагогикалык институтында да йогары белгилерине окып, етимисли окувшылардынъ, студентлердинъ бириси болып келди. Педучилищеде билим алганнан сонъ, кеспили окытувшы баслап Кизляр районынынъ Ясная поляна, Мангулаул эм оннан сонъ Крайновка авыл орта мектеблеринде окытувшылык сулыбын байытып келди.
Яслыгында окытувшы кыздынъ йолында Байгаджи деген йигерли ногай яс рас болып, эки ястынъ арасында суьйим сезимлери тувып, олар татым аьел курадылар. Сол аьелде уьш аьвлетлери: Рустам (яткан ери еннетли болсын), Мурат эм Бурлият кызы тувып асыл болдылар. Олар баьриси де йогары билим ошакларында окып, суьйген кеспилерининъ иелери болганлар. Сол кеспилери бойынша олар савлай яны ман берилетаган ис аьрекетлеринде етимислер коьрсетип келедилер.
Яшавын халкын билимлендируьвге багыслап келетаган кыскаяклыдынъ оьктеми, ис аьрекети бойынша етимисининъ тамамы – ол онынъ колында тербия алып, яшавдынъ кенъ йолына туьскен, алтын эм куьмис медальлерине тийисли болган окувшылары боладылар. Буьгуьн оьз окытувшысынынъ йолын алып, билимлендируьв тармагында оьзлерин сынап келетаган окувшыларынынъ саны да аз тувыл. Ол окувшыларынынъ аьр кайсысынынъ уьстинлигине суьйинеди, олардынъ бактысы ман дайым кызыксынады. Окытувшы олардынъ акында уьйкен оьктемлик пен эсине туьсиреди.
Яшавынынъ элли йылдан артыгын билимлендируьв ис аьрекетине багыслаган сыйлы окытувшыдынъ кыйыны эли мен билинмей калмады. Янъыларда бай сулыплы окытувшыга куллыгында коьрсеткен бийик етимислери уьшин ДР Халк билимлендируьвининъ отличниги деген сыйлы аты тийисли этилди.
Баска болып, Улангерек Ягьяевадынъ ис аьрекетиндеги етискен уьстинликлери мектеб, район, Билимлендируьв министерствосынынъ етекшилеви мен коьп кере Сый грамоталар, Разылык хатлар, дипломлар, акшалай баргылары ман белгиленген. 1983-нши йылда ол Махачкалада оьткен Дагестан окытувшылардынъ етинши курылтайынынъ делегаты да болып айырылган.
Окытувшы кыскаяклы коьплеген туьрли ерлерде, айтпага, Германия, Турция, Чехия, Австрия эм Италия эллеринде де конакта болган. Сол ерлерде болганы, коьргенлери акында ол мектебте окувшыларына, уныкларына кызыклы хабарлап келеди.
Буьгуьнлерде Улангерек Байрашевнадынъ балдан таьтли уныклары Батирхан, Рустамбек, Сабина, Амина, София, Микаил эм ялгыз немереси Амина онынъ окувда, ис аьрекетлеринде етимислери мен коьнъилин эм куьезин оьстирип келедилер.
Улангерек Байрашевнага яны ман сайлаган исинде келеекте де бийик етимислер, берк ден савлык, узак оьмирди, онъайлыкты, ийги окувшылары коьп болганын сагынаман.
Г.Нурдинова.
Суьвретте: Улангерек Ягьяева.
