Уьстимиздеги йылдынъ карагыс айынынъ 15-нши куьнинде Астрахань каласында XXX мерекели Джанибеков окувлары уйгынланып оьттилер. Шара Астрахань областининъ туризм эм маданият министерствосы, область бойынша халк маданиятынынъ илми методикалык орталыгы ман, «Приволжский район» МО администрациясы эм «Эдиге» деген Ногай маданият орталыгы ман уйгынланган эди. Шарадынъ шатлыклы ашылувы «Азимут» деген отелининъ конференц-залында оьтти.
«Ногайские эпосы народов России, как ресурс культурно-исторической интеграции тюрков России» деген тема бойынша оьткен тоьгерек столында Башкортостан, Крым, Дагестан, Карашай-Шеркеш Республикаларыннан, Томск, Астрахань областьлериннен аьлимлер, авызлама халк яратувшылыгын йыювшылар, этнографлар, краеведлер ортакшылык эттилер. Форумда область бойынша халк маданиятынынъ илми-методикалык орталыгынынъ етекшиси Елена Зинина, «Эдиге» деген Ногай маданият орталыгынынъ председатели Ильдар Альмухамбетов, Красноярский район МО Советининъ председателининъ орынбасары эм баскалар хошлав соьзлерин айтып кеттилер. Олар оьз соьйлевинде регион бойынша ногайлардынъ маданият асабалыгын саклав аьрекети бойынша проекттинъ уьйкен маьнелигин белгиледилер. Солай болып форум катнасувшыларына етимисли аьрекетин йорадылар.
Форумды профессор, тарих илмилерининъ докторы, Дагестан эм Карашай-Шеркеш Республикаларынынъ ат казанган илми аьрекетшиси, Россиядынъ илмилер академиясы бойынша Дагестаннынъ илми орталыгынынъ тарих, археология эм этнография институтынынъ алдышы илми куллыкшысы Даниял Кидирниязов юритти. Ол алдыда каралаяк соравларды белгилеп, йолыгыста ортакшылык этеек спикерлери мен йыйылганларды таныстырды. Семинар катнасувшылары Россиядынъ тюрк халкларынынъ ногай эпослары акында ойлары ман, ногай миллетининъ тарих-маданият бойынша оьрленуьви мен байланыслы соравларын карадылар. Баска болып, сол эм баска соравларын оьз соьйлевлеринде илми кандидаты, Карашай-Шеркеш гуманитарлык тергев институтынынъ алдышы илми аьрекетшилери Аминат Курмансеитова эм Аминат Капланова, Россия илмилер академиясы бойынша Уфа каласындагы федераллык тергев орталыгынынъ тарих, тил, адабиат институтынынъ илми куллыкшысы Ахат Салихов, Томск каласындагы патшалык университетининъ илми куллыкшысы Гульсифа Бакиева, крым краеведи Эльвира Кемал, Астраханьнинъ патшалык университетининъ илми куллыкшысы, доценти Виктор Викторин, РАНХ и ГС Астрахань каласындагы филиалынынъ етекшисининъ орынбасары Эльдар Идрисов, Астрахань каласындагы патшалык университетининъ Россия тарихи бойынша соискатели Рамиль Ишмухамбетов ашыклап белгиледилер.
Баска болып, онлайн кебинде шарага Москва каласыннан, Кабарты-Балкар Республикасыннан, Турция элиннен де аьлимлери косылдылар.
Форум бойынша художест- волык-адабиат выставкасы да уйгынланган эди. Онда ногай язувшыларынынъ шыгармалары коьрсетилген эдилер, сонынъ ишинде Абдул-Хамид Джанибековтынъ «Соьз казнасы» деген халк авызлама яратувшылыгы бойынша йыйынтыгы да бар эди. Джанибековтынъ окувлары Дослык уьйининъ яратувшылык коллективлерининъ, айтпага, «Астраханская песня», «Тулпар», «Дослык», «Яныма», «Тантана» деген ансамбльлерининъ белсенли катнасувы ман тамамланды.
Соьйтип билимлендируьв шарасы пайдалы эм йогары коьнъилде уйгынланып оьтти.
Суьвретте: шарадан коьринис.
