Ийги аьдемлердинъ акында язбага тыныш эм суьйинишли. Меним хабарым буьгуьн бизим ердесимиз, районымыздынъ социаллык-экономикалык оьрленуьвине уьйкен уьлис коскан хатынлардынъ бириси – Альмира Ялманбет кызы Капашовадынъ акында.
Мен коьплеген йыллар оны ман тар байланыс тутаман, Альмира Ялманбет кызындай аьдемлер мен катнаспага тыныш, ол аьр заман ярдамга келмеге, ийги соьзлер тавып, коьнъилди йогары коьтермеге аьзир. Ол оьз халкын, тувган ерин бек куьшли суьеди. Буьгуьнлерде Альмира Ялманбет кызы Капашова оьзининъ сыйлы 70 йыллык мерекесин белгилейди.
Альмира Ялманбет кызы Терекли-Мектеб орта мектебин битирип, ис аьрекетин Кумлы авылында мектеб ишиндеги интернатта тербиялавшы болып баслайды, сонъында кызалак Карашай-Шеркеш пединститутынынъ филология факультетине окымага туьсип, уьстинликли битиреди. Окув йылларында ол бириншилердинъ сырасында болады. 1970-нши йыл институттынъ комсомол комитети бажарымлы студенткады Домбайга курылыс отрядынынъ комиссары этип йибереди, мунда «Тав бийикликлери» деп аталып, халклар ара яслар орталыгы курылып турган болган. Сол йыл Альмира Ялманбет кызы институт атыннан краевой слетта катнасады, ога ВЛКСМ крайкомынынъ Сый грамотасын эм атаклы саьат тапшырадылар.
Институтты битирген специалист Карагас орта мектебинде класстан эм мектебтен тыс исининъ етекшиси болып куллык этеди. Сол йыллар окытувшы сулып йыйнайды, окытувшылык тармагынынъ коьплеген сырларын ашады. 1976-ншы йыл бажарымлы окытувшы, директор болып ислеп баслайды. Онынъ тынышсыз юреги куллык уьшин авырыйды. Яс директор янъы мектеб салув керек деген соравды коьтереди. Кыйынлыклар ман басланды мектеб курылысы, карыжлар етпейди. Коьп капылар ашпага туьсти Альмира Ялманбет кызына, Москва, Махачкала калаларына коьп кере бармага, туьрли ведомстволарынынъ, министерстволар приемныйларында саьатлеп олтырмага туьссе де, 1983-нши йыл янъы мектеб Карагас авылында ислеп баслады.
Альмира Ялманбет кызына суьйикли иси яшавынынъ маьнеси эди аьр заманда да. 1987-нши йыл бажарымлы етекши «РСФСР халк ярыкландырувдынъ отличниги» деген сыйлы атка тийисли болган.
1994-нши йыл Альмира Ялманбет кызы Карагас авыл администрациясынынъ аькимбасы болып туьседи. Биринши куьннен алып иске урынады етекши, ол авыл яшавшылары алдында яваплылык сезетаган эди. Авылда маьселелер коьп эди – авылдынъ яртысы агаш ягатаган эдилер уьйлеринде. Коьплеп-коьмеклеп, авыл яшавшылары ГРП курадылар. 1995-нши йылдан алып Карагас авыл яшавшылары газ пан пайдаланып баслайдылар. Райадминистрациясы ман тар байланыс тутатаган эди Альмира Ялманбет кызы (сол заман районда Аскер Муса увылы Аджиев басшылайтаган эди). 1998-нши йыл Карагас авылында артезиан казылган. Альмира Ялманбет кызы етекшилеген йыллар Карагас авылында коьп куллыклар этилинди.
1998-2002-нши йыллар Альмира Ялманбет кызы район билимлендируьв управлениесинде ана тил бойынша методист болып иследи. Сол йылларда управление етекшиси, Дагестан Республикасынынъ ат казанган окытувшысы Зухра Казбек кызы Мусаурова йылы соьзлер айтады ис йолдасы акында.
– Альмира Ялманбет кызы управлениеге ислемеге келгенде ок куллыкка урынды, онынъ ис сулыбы бу тармакта айлак уьйкен эди. Ол куллыгына бек мукаят эди, ис йолдаслары ман тил тавып, оьз исин бардыратаган эди. Методист конференциялар, баска шаралар уйгынлавда баьри куьшин, билимин салатаган эди. Соьйтип, Ногай район билимлендируьв управлениесинде Альмира Ялманбет кызынынъ уйгынлавы ман савлай республика бойынша УО етекшилерининъ катнасувы ман конференция озды. Районымыздынъ окытувшылык ямагатшылыгында Альмира Капашова сый-абырай казанган, – деп хабарлайды Зухра Казбек кызы.
2002-2016-ншы йыллар Альмира Ялманбет кызы Карагас авыл администрациясынынъ аькимбасынынъ орынбасары болып ислейди. 2008-нши йыл «Единая Россия» Савлайроссиялык партиясынынъ XIX съездининъ делегаты болып сайланган. 2009-ншы йыл Ногай районы туьзилгенли 80 йыл ман байланыста Дагестан Республикасынынъ Сый грамотасы ман савгаланган. 2016-ншы йыл Альмира Капашова Дагестан Республикасынынъ муниципаллык туьзилислерининъ советининъ Ассоциациясынынъ Сый грамотасына тийисли болган.
Аьлиги заманда Альмира Ялманбет кызы тийисли тыншаювда, болса да онынъ тынышсыз юреги ога уьйде олтырмага пай бермейди. Аьли де ол халкы акында ойлайды, районда, авылда озгарылатаган баьри ямагат шараларда да катнасады, ол – авыл Ясуьйкенлер советининъ, район Хатын-кызлар союзынынъ президиумынынъ агзасы. Ясуьйкен деп ога авылшылар маслагатласпага келедилер, туьрли соравлар бойынша тел согадылар.
Альмира Ялманбет кызы, баска аналардай болып, балаларына, уныкларына куьезленип турады. Увылы Ахмат – фермер, келини Алтынай ерли мектебте окытувшы болып ислейди. Уьйкен уныгы Марат Пятигорск каласында Сырт-Кавказ университетинде окыйды, уныгы Булат Михайловский военный академиясында окыйды, ол Кызыл майданда Енъуьв Парадында катнаскан, унык кызы Латифа экинши класста окыйды, энъ кишкейлери Карим балалар бавына юреди.
Мен ак юректен сыйлы хатынларымыздынъ бириси – Альмира Ялманбет кызы Капашовады мерекеси мен кутлайман, коьп ийгиликлер, берк ден савлык йорайман.
А.Манкаева,
Ногай район Хатын-кызлар союзынынъ председатели.
Суьвретте: А.Капашова.
