22-нши июнь. Бизим уьйкен элимиздинъ аьр бир яшавшысына кайгылы эм эстеликли, Уллы Аталык согысы басланган куьн. Быйылгысын биз эндигиси 80-нши кере йолыктык. Сонынъ 76 йылын согыссыз тынышлы кепте оьткерип келемиз. Ол аз зат тувыл эм сонынъ уьшин 27 миллион совет аьдемлери оьз янларын бергенлер.

Сол куьн Ногай район орталыгы Терекли-Мектеб авылындагы Эстелик мемориалында эскеруьв шарасы оьтти. Бу шарада Ногай район администрациясынынъ аькимбасы Мухтарбий Аджеков, онынъ орынбасары Баймагомед Ярлыкапов, район согыс эм ис, ыхтыяр саклавшы органларынынъ ветеранлар Советининъ председатели Акманбет Сангишиев, район Ясуьйкенлер советининъ председатели Рашид Мурзагишиев, Афганистан согысынынъ район ветеранлар советининъ председатели Сталинбек Култаев, КПРФ Ногай РК ваькиллери эм баскалар катнастылар.
– Буьгуьн муннан 80 йыл артта каты аявсыз Уллы Аталык согысы басланган. Согыс элимиздинъ миллионлаган аьдемлерининъ, сонынъ санында бизим ердеслеримиздинъ де 2 мынъга ювык яшавларын кыскарткан эм аьр бир уьйге уьйкен кайгы эм авыр сынавлар ман кирген. Биз тагы да бир кере баьри согыс катнасувшылары, тыл куллыкшылары, Тувган Эли уьшин ян бергенлердинъ баьриси алдында да басымызды тоьмен иемиз. Бизим бас борышымыз – халкымыздынъ уллы йигитлиги акында эстеликти оьмирлерге саклав, соны оьсип келеяткан яс несиллерге тапшырув, оьзимиздинъ тарихимизди сыйлав, – деп белгиледи Мухтарбий Аджеков.
Эстеликли шарада район согыс эм ис, ыхтыяр саклавшы органлар советининъ председатели Акманбет Сангишиев те шыгып соьйледи. Ол оьз соьзинде элимиз яшаган шаклы 22-нши июнь куьни биз уьшин эстеликли эм кайгырув, халкымыз уьшин оьктемсуьв, онынъ дуныяда болмаган уьйкен эрлиги эм баьтирлиги мен куьезленуьв куьни болып тураяк деди.
Муннан сонъ Уллы Аталык согысында ян берген ердеслеримиздинъ эстелигине эм парк ишиндеги кардаш камырына шешекейлер байламлары салынды. Шарадынъ катнасувшылары фашизм мен куьресте ян бергенлердинъ ярык эстелигин бир такыйкага уьндемей токтап эскердилер.
Бизим хабаршы.
Суьвретте: эстеликке гуьл байламы салынады.