Оьткен юмадынъ ишинде, дурысын айтсак, карагыс айынынъ 9-ншы куьнинде «Ногайский район» МР администрациясынынъ меканында район етекшиси Мухтарбий Кошманбет увылы Аджеков, «Единая Россия» партиясынынъ йогары советининъ агзасы болып, гражданлар ман йолыгыс озгарды.
Аьр кайсы йолыгыска да гражданлар, сол йолыгыс кайсы ваькилли органнынъ аьдеми мен болса да, туьрли маьселели соравлары ман келедилер. Сол соравлар ишинде коьбисинше, авыл ерлеринде яшайтаганлар ман йолыгыс болса, коьгилдим от, янъы билимлендируьв учреждениелерининъ курылысы, йол, сув эм сондай баскалар коьтериледилер.
А власть органларынынъ ваькиллерине болса, халкты тынълап болув, оларды эситуьв – энъ де маьнели. Солай болганда, олардынъ араларында ийги катнас коьпири де болады, куллык та оьрге барады.
Гражданлар ман йолыгысларды, «Единая Россия» партиясы уйгынланганлы бери, сонынъ ваькиллери озгарып келедилер. Сол да болар бу партиядынъ ис аьрекетин йогары дережелерге салатаганы, халк арасында сыйын коьтерип, керекли эм куьшли этетаганы.
Бу куьн йолыгыска биринши болып «Ногайский район» МР-нда аьрекет бардыратаган Ямагат палатасынынъ председатели Эльмурза Саитов Кумлы авылында мектебтинъ янъы меканынынъ курылувы акында соравын берди.
Онынъ берген соравына Мухтарбий Аджеков толы явап берди.
– Келеятырган 2022-нши йылда Ногай районымыз бойынша Кумлы эм Шуьмлелик авылларында мектеб меканлары курылып басланаяк, аьли уьшин бу эки авылдынъ болаяк мектеблерининъ проектлери де аьзир, – деди Мухтарбий Аджеков.
Йолыгыстынъ барысында «село Терекли-Мектеб» СП МО аькимбасы Зейдулла Аджибайрамов пан тренер Алан Ярикбаев бирге Ногай район яслары арасында кеспили спортсменлерди тербиялав уьшин, баьри керекли шартлары ман стадион болмага керек деген соравды бердилер.
Куьнбатар авыл ериндеги маьселелер акында муниципаллык туьзилисининъ етекшиси Замид Яриков пан онынъ орынбасары Зиявдин Шабазгереев айтып кеттилер.
– Аьли уьшин Куьнбатар авылы Ногай районымыздынъ уьйкен авылларынынъ бириси болады. Келеек йылда авылымызга 120 йыл толады, сол мерекемизге орта орамына асфальт тоьселсе экен, – деген ойын билдирди З.Яриков.
Бу куьн аьр бир келген аьдемге Мухтарбий Аджеков толы эм ийги явабын берди эм соны ман йолыгысты тамамлады.
Г.Сагиндикова.
Суьвретлерде: йолыгыс озган шагы.
