Быйыл, 30-ншы сентябрьде, Москвада Кремльдеги Георгиев залында Россия Федерациясы сырасына янъы субъектлерди: ДНР, ЛНР, Запорожский мен Херсонский областьлерди алув ман байланыслы шара болып оьтти. Бу тарихке кирген маьнели оьзгеристе Россия Президенти Владимир Путин халкка каратылган шакырувы ман шыгып соьйлеген. Сонынъ акында оьзининъ ойын «Единая Россия» Савлайроссиялык политикалык партиясынынъ Ногай ерли боьлигининъ толтырувшы секретари Амирхан Межитов айтады.

– Россияга бола-болганлы орыс ерлери деп саналатаган регионлардынъ кируьви акында келисуьвди туьзеектен алдын, Владимир Путин оьзининъ Россия яшавшыларына каратылган шакырувында Совет Союзынынынъ бузылувына йол ашкан 1991-нши йылдагы Беловежский келисуьвдинъ законсыз экенин айырым белгиледи. 1991-нши йылдагы карар аьдемлердинъ ой-ниетлерин эсапка алмаган, олардан бир зат та сорамай баьри де тири байланысларды кесип таслаган. Путин миллионлаган совет аьдемлердинъ эркине карсы уллы патшалыкты бузганларын эске салды.
Элимиздинъ етекшисининъ соьзинде Донбасс яшавшыларынынъ Россия ман бирлесуьвге ымтылысы мысалында Россияга суьйимлик сезимин бирев де йок этип болмайтаганы аян кепте сезилди. Эндигиден армаган ДНР, ЛНР, Запорожье эм Херсон областьлеринде яшайтаган аьдемлер дайымлыкка Россия гражданлары боладылар! Куьнбатардагы эм Киевтеги власть иелери халктынъ сайлаган йолын макул коьрмеге эм сыйламага тийисли.