Район Депутатлар йыйынынынъ коьбисининъ тавыс беруьв сырагылары бойынша Ногай район аькимбасы этилинип Джамалутдин Айнадинович Эсиргепов сайланды. Кенъес тергев юритуьвши ведомстволар ваькиллерининъ, авыл поселениелер аькимбасларынынъ, муниципаллык эм оькиметлик учреждениелер етекшилерининъ катнасувы ман оьтти. Солай ок тавыс беруьв исине конкурс комиссиясы да эс каратты. Оьткен тавыс беруьв иси бойынша оьз ойлары ман боьлисип, Ногай районынынъ янъы сайланган аькимбасы булай деди:

– Мен, Ногай районынынъ баьри яшавшыларындай болып, бизим ямагатымыз алдында турган баьри маьселелерди шешилгенди суьемен. Баьрисин де, бос соьзлерге эс каратпай, биргелесип куллык этуьвге шакыраман. Сайлавлар тавыс беруьв процедурасы ман келисте озгарылды. Биз баьримиз де яшавга кирген законодательствога бойсынмага тийислимиз. Ногай районынынъ аькимбасынынъ ис орынында мен оьз халкымнынъ сенимин аклав уьшин баьри куьшимди саларман. Алдыда куллык коьп, эгер биз оьз куьш-куватымызды бирлестирсек. Кайдай кыйынлы борыш та яшавга шыгарылып болаяк.