Ногай район администрациясында Хатын-кызлар куьнининъ алдында СВО борышларын толтырувда яраланган йигитлердинъ аналары, хатынлары оьрметлендилер. Йолыгыста Ногай район Хатын-кызлар советининъ председатели Асият Манкаева белсенли катнасты, сыйлы конаклар эсабында мунда Алимбек Доржиевтинъ хатыны, Аслан Бециевтинъ тетеси, Расиль Саитовтынъ, Ренат Елманбетовтынъ, Ислам Нургишиевтинъ, Мавлидин Османовтынъ, Адильбек Дуйсенбиевтинъ, Муратали Джумагельдиевтинъ, Мутаир Кульниязовтынъ, Артур Тангатаровтынъ анасы шакырылдылар. Бу белгиленген яс йигитлер бизим таза аспанымыз, тынышлыгымыз, рахатлы яшавымыз уьшин яв ман куьресип, оьз ден савлыгын эм яшавын сынавга салып, согыс спецоперациясынынъ борышларын толтырганлар. Толтырганлар деп язувым, аьли олар билимли врачлар колында госпитальлерде эмленедилер. Эли уьшин оьзин аямаган, Аталыгынынъ алал увыллары ден савлыгын беркитип, аьли де яв ман куьреске шыгармыз деген ниетлери бары акында эситемиз.
Келген конак-кыскаяклылар- ды Ногай район администрациясынынъ аькимбасы Джамалутдин Эсиргепов йылы хошлады эм коьп ийги йоравларын айтты. Ол хатын-кыскаяклылардан кайдай коьмек керекли экенин сорап, район администрациясы колыннан келген баьри ярдамды этеегин билдирди. Бурлиянт Нургишиева оькимет яктан керекли коьмек этилинетаганын белгиледи. СВО катнасувшыларынынъ аналары бу тыныш болмаган заманда оларга аьр бир йылы соьз, карас, коьтергишлев бек керекли эм маьнели экенин айттылар. Сол керекли эс этилетаганы уьшин олар район администрациясынынъ аькимбасына, авылдасларына таьвесилмес разылыгын билдирдилер. Йыйылган хатынлардынъ коьзлери мунълы болса да, баьтир увыллары – Аталыкты коршалавшылары уьшин оьктемлик те сезилмей болмады.
Йолыгыс барысында Эрклик ордени тапшырылган СВО катнасувшысынынъ анасы, педагогикалык исининъ ветераны Саниет Елманбетова аналарга багысланган ятлавды юреклерге етип окыды.
«Россия державасы – энъ де уллы эм куватлы, мунда табиат байлыклары айлак коьп. Соны ман баска эллер етекшилеви разы болып болмайдылар. Биз Россия Президенти Владимир Путиннинъ аьр бир ой-токтасын, аьр бир карарын анълаймыз, яклаймыз эм коьтергишлеймиз. Мен онынъ РФ Федераллык Йыйынына каратылган Язбасынынъ аьр бир соьзин тешкерип тынъладым. Онынъ Язбасы – каьмбиллик. Владимир Путин – дуныядагы энъ де ийги политик, ол бир неше йыл алдын болаяк ислер акында ойланады», – деп оьз ойы ман Саниет Кадырбердиевна боьлисти.
Йолыгыс бек йылы аьлде, берекетли сыпыра тоьгерегинде оьтти. Аналар юрегиндеги мен боьлистилер, оьз увыллары акында хабарладылар. «Элге келген кыйынлыкты, эл мен бирге оьтемиз», – деген акыллы соьзлерди де айттылар.
Н.Кожаева.
Суьвретте: Д.Эсиргепов эм Б.Нургишиева.