Янъыларда Дагестан Республикасынынъ Кизляр районында яшайтаган ногайларымызда конакта болып, эстеликли йолыгыс озгарып кайттык.
Мени мен бирге йолыгыста ногай тилдинъ магистри Ахмед Казаков эм Нефтекум каласынынъ балалар суьвретлев бойынша мектебининъ окытувшысы Ислам Курманов катнастылар.
Онда бизди ямагат организациясы, Кизляр каласынынъ эм сол ок район бойынша «Ногай Эл» деген миллет-маданият автономиясынынъ председатели Изидин Бигишиев хош коьрип алды. Изидин-агай бизди оьзининъ уьйинде ырызгы-берекет пен йылы йолыкты. Сонъ уьйле вакытта Ново-Владимирское авылынынъ (ога ерли яшавшылар Горбовка дейдилер) ортак билимлендируьв мектебинде окувшылар ман йолыгыс- ка йолландык.
Йолыгыста сосы авыл яшавшысы, белгили ногай суьвретшиси, пышаклар, муьлк ясавшы Аджимуса Аджибатыров та ортакшылык этти. Мектебтинъ етекшиси Иманали Мантиков йолыгыска келген туьрли класслардынъ окувшыларын биз бен таныстырды эм ана тилдинъ аьдем яшавында тутатаган орыны акында хабарлады.
– Куьн яхшы болсын, балалар! Буьгуьн бизге конакка Карашай-Шеркеш Республикасыннан «Маьметекей» деген адабиат-суьвретлев журналынынъ бас редакторы, етекшиси, «Ногай давысы» деген республикалык газетасынынъ хабаршысы, Россиядынъ Язувшылар эм Журналистлер союзларынынъ агзасы Асан Найманов, ногай тилдинъ магистри Ахмед Казаков эм Нефтекум районынынъ Новкус-Артезиан авылыннан суьв- ретши Ислам Курманов келдилер.
Сосы йолыгысларымыздынъ бас мырады – балалар арасында ногай тилимизди кенъ яйылдырув, билимге ымтылысы болганларды белгилев болады. Бас байлыгымыз – ол тилимиз. Тилди йойсак, халкымыз да йойылар, – деди амалламады бардыра келип, мектебтинъ етекшиси.
Йолыгыста мен журналымыздынъ оьткен яратувшылык йолы, яшавга эндиретаган янъы проектлери, «Маьметекейдинъ» бетлеринде баспаланатаган макалалар акында хабарладым эм окувшыларга язган ятлавларын, хабарларын, эткен суьвретлерин редакциямыздынъ электронлы почтасына йибермеге болаякларын айттым.
Сонда окувшылар да журналымыз бан кызыксынувларын билдирдилер эм бир нешевлери эткен суьвретлерин де бердилер.
Йолыгыста суьвретши досымыз Ислам Курманов балаларга суьвретлер ясавдынъ сырлары акында озгарган мастер-классында толы хабарлады, язган ятлавларын да окып эситтирди. Окувшылар оьнерли суьвретшиден оьзлерин кызыксындыратаган коьп соравларга толы явапларды эситтилер.
Оннан сонъ биз мектеб етекшиси Иманали Мантиковты ногай тилди саклавга киргистетаган уьлиси, «Маьметекей» журналымыздынъ редакциясы ман тар байланыс келгени уьшин Разылык хат пан савгаладык. Сондай Разылык хат пан зейинли ногай суьвретшиси, пышаклар ясавшысы Аджимуса Аджибатыровты да, яс оьспирди оьзи билген усталыкка уьйретуьви уьшин, савгаладык.
Йолыгыс айлак кызыклы эм пайдалы болып озганы уьшин мектебтинъ етекшисине, окытувшыларга муьсиревимизди билдиремиз.
А.Найманов.
Суьвретте: йолыгыстан коьринис.
Автордынъ алган суьврети.
