Янъыларда Ногай районынынъ Терекли-Мектеб авылынынъ маданият уьйинде белгили ногай шаири Мурат Авезовтынъ 70 йыллык мерекесине багысланып, шатлыклы шара озгарылды.

Шаирди кутлав соьзи мен «Ногайский район» МР администрациясынынъ аькимбасы Мухтарбий Аджеков, «Ногайский район» МР администрациясынынъ район Депутатлар Йыйынынынъ председатели Джамалутдин Эсиргепов, белгили шаир Анварбек Култаев, Ставрополь крайынынъ думасынынъ депутаты Заурбек Шерпеев, Россия ногайларынынъ РНКА дагестан боьлигининъ председатели Зейдулла Аджибайрамов, «Шоьл тавысы» республикалык газетасынынъ бас редакторы Эльмира Кожаева, ногай композитор Яхья Кудайбердиев, «Айланай» фольклор-этнографиялык ансамблининъ етекшиси Мурат Ваисов шыгып соьйледилер. Шаирди мерекеси мен кутлап, Ставрополь крайыннан конак болып Россия ат казанган авылхозяйстволык куллыкшысы, Россия ат казанган мелиораторы Агали Канаев, тарих илмилер кандидаты Арслан Уйсенбаев келдилер.
Кешликти уйгынлавшысы эм юритуьвшиси Дагестан Республикасынынъ ат казанган маданият куллыкшысы Сабират Абубекерова филология илмилерининъ докторы Насипхан Союновадан эм филология илмилерининъ кандидаты Фания Кусегеновадан, «Ногай давысы» газетасынынъ бас редакторы Алтынай Атуовадан шаирди кутлав телеграммаларын окыды. Концерт программасында шаирдинъ ятлавлары окылды, йырлары занъырады.
Кешлик тамамында келген конакларга, шарады уйгынлавшыларга разылык соьзи мен мерекеши Мурат Алибек увылы Авезов шыгып соьйледи. Ол соьйлевинде келеектеги несилге ана тилин саклав керек деген насихат соьзлерин айтты. Оьз разылыгын шаирдинъ иниси, Дагестан Республикасынынъ Халк Йыйынынынъ депутаты Мурзадин Авезов та билдирди.
Шатлыклы шара коьтеринъки коьнъилде оьтти.
Г.Бекмуратова. Суьвретте: М.Авезов.