Меним бактымнынъ маьнели шакларынынъ бириси – меним шаирлигим. Белки, шаирге оьз акында язбага да аькис, болса да мен буьгуьнлерде оьз окувшыларым ман болган йолыгысты оьзим газета бетлерине салмага, ойымды айтпага, разылыгымды уйгынлавшыларга билдирмеге ниет эттим.
Янъыларда Ногай район орталык китапханасында меним окувшыларым ман йылы аьлде «Таза болсын уьмитлер» деп аталып, йолыгыс озды. Китапхана куллыкшылары ман уйгынланган шарада катнасканлардынъ аьр бириси туьрли ерлерде ислесе де, поэзия суьювшилери эдилер.
Шарада «Шоьлим меним – аьдуьвлеген бесигим» деп аталып, меним яратувшылыгыма багысланып, китап эм суьврет выставкалар уйгынланган. Китапхана куллыкшысы Сапихан Курпаева кызыклы аьлде шарады юритти. Ол йолыгыс барысында келген конакларга соьз берип, арасында мени мен де хабарласты, окувшыларды кызыксындыратаган соравлар берди. Сол соравларга яваплай берип, мен оьзимнинъ балалыгымнынъ сокпакларын, биринши ятлавым кайзаман язылганын, яшавымда болган суьйинишли эм кайгылы куьнлеримди эсиме алдым.
Бу йолыгысты мен шаирлик кешлиги деп айтар эдим. Келгенлер шыгып, меним ятлавларымды окыдылар, Карасу авыл мектеб филологы Байбийке Нугман кызы Даутова, Кадрия атындагы мектеб окытувшысы Медина Аджибатир кызы Мусаурова меним ятлавымды окыдылар эм анализ эттилер. Солай ок меним ятлавларымды М.Байгараева, А.Якубова, Д.Аманбаева, А.Гапарова, М.Айтуганова, Т.Оракова, Б.Давлетова яттан окыдылар. Олардынъ кайбириси оьзлерининъ суьйикли ятлавларын окыгангама экен, мени кайтип суьйиндирдилер, аьр бир сыдырага юрегин салып айттылар. Кутлав соьзи мен «Шоьл тавысы» республикалык газетасынынъ бас редакторы Э.Кожаева, ис эм калем йолдасым М.Ханов, Ногай районынынъ Хатын-кызлар советининъ председатели А.Манкаева, Тахо-Годи атындагы уьлке танув музейининъ Терекли-Мектебтеги филиалынынъ директоры К.Бальгишиев, суьвретши М.Шалиева шыгып соьйледилер. Район китапханалар куллыкшыларынынъ атыннан ЦБС директоры С.Абубекерова соьйледи. Ол, баьрисининъ де юреклерине тийдирип, меним «Мен де сени куьтемен» деген поэмамнан уьзикти окыды. Шарада меним йырларым да йырланды. Белгили ногай йырлавшымыз Бегали Куруптурсунов «Аданасыма», «Суьйим вальсы» деген йырларды эситтирди.
Сол куьн меним коьнъилиме коьнъил косылды. Аьр бир шаир халкы уьшин язады, ама баьри шаирлерди де халкы окымайды. Меним ятлавларым окувшыларымнынъ янларына тийип, юреклерди телезиткен сыдыраларым бар болганына тагы да бир кере шайыт болдым эм суьйиндим. Сол суьйиниш мени тагы да коьп язувларды калем астыннан шыгармага даьвлендирди.
Меним шаирлигиме эс берип, заманын да кызганмай, мага багысланган шарага келгенлерге, сондай йолыгысты уйгынлаганларга ак юректен оьз разылыгымды билдиремен. Оьзиме Кудай ман берген шаирликти мен яваплылык деп санап, келеекте аьли де ислермен деп окувшым алдында айтаман.
Г.Бекмуратова.
Суьвретте: шарадан коьринис.
