Янъыларда Ногай район орталык китапханасында, Россиядынъ эм Дагестан Республикасынынъ уллы шаири Расул Гамзатовтынъ эсине багысланып, «Тавдынъ данъклы увылы» деген шаирли саьати оьтти. Шарада китапхана куллыкшылары ман бирге А-Х.Джанибеков атындагы мектебтинъ 7-нши классынынъ окувшылары катнастылар. Китапханашылар «Дуныя уьстинде йогары ушкан карагус» деп атап, выставка озгардылар, келгенлер шаирдинъ ятлав йыйынтыклары, журналлар, газеталар, Расул Гамзатовтынъ айткан соьзлери эм сондай баска билдируьвлер мен таныстылар. Китапхана куллыкшысы Арина Якубова уллы шаирдинъ яшав эм яратувшылык йолы акында кызыклы хабарлады. Бу шарада коьплеген темаларга соьйленди – ата-ана, Аталык, суьйим лирикасы. Окувшылар язувшыдынъ шыгармаларыннан уьзиклер окыдылар. Шарада Айгуль Абдулкеримова, Айганат Байгараева, Минарет Койлубаева, Азиза Бекмуратова катнастылар. Энъ де маьнели – окувшылар язувшыдынъ шыгармаларын окыганда, онынъ сезимлерин оьзлери янларыннан оьткерип, тынълаганларга да коьрсетпеге шалыстылар.
Расул Гамзатовтынъ шаирлик дуныясы кайдай бай эм ярасык. Онынъ талабынынъ ушкынлары баьримиздинъ юрегине де етеди.
Г.Бекмуратова.
Суьвретте: шарадан коьринис.