2020-ншы йылдынъ кырк кийик айынынъ 15-нши куьниннен алып «Россия Федерациясына шет эллердинъ гражданинлерин конакка шакырган да, шакырылган аьдемлер де тийисли йорыкларды тутув уьшин озгарылатаган шаралар» деген 1428-нши номерли Россия Федерациясынынъ Оькиметининъ токтасы кабыл этилинип алынган.
Сол токтаска коьре, эки яктынъ да оьз борышлары белгиленгенлер. 2002-нши йылдынъ шилле айынынъ 25-нши куьниннен алып «Россия Федерациясында шет эллердинъ гражданларынынъ ыхтыярлары» деген 115-нши номерли Федераллык Законынынъ 16-ншы статьясына коьре, шет эллердинъ гражданинин шакырган беттинъ де тутпага керек йорыклары бар. Шет эллердинъ гражданлары Россия Федерациясына келмеге ниети бар болганда, ол келгенше, кайдай ыхтыярлары болаягын эртеректен билмеге керек. Шет эллердинъ гражданларынынъ Россия Федерациясына келуьви де туьрли болмага болады: биревлер ис аьрекети бойынша, баскалар кыдырып, экиншилер ислемеге, уьшиншилер окувын бардырмага келмеге боладылар. Ис аьрекети бойынша келген шет эллердинъ гражданларына шакырганлар баьри шартларды да тутпага кереклер. Медициналык яктан да, олар керексинетаган болсалар, канагатланмага кереклер.
Шет эллердинъ гражданлары соьйлескен, оларды Россия Федерациясында йолыгаяк аьдемлер мен, мунда келгеннен сонъ да, байланысын йоймага боладылар. Сондай аьллерге калгандай болсалар, эки як та Россия МВД-сынынъ территориаллык органына, байланыс йойылганы акында аьризе язадылар. Сол аьризе эки куьн узагында каралады эм шет элдинъ гражданларын шакырган бет пен йолыгысадылар эм соравды шешилуьвди МВД-дынъ тийисли органларына береди.
Россия Федерациясына кыдырып келген шет эллердинъ гражданлары конак уьйлерде, медициналык учреждениелерде, тыншаюв уьйлерде, балалардынъ тыншаюв лагерьлеринде токтамага боладылар, ама олар миграционлык учетка салынадылар. Олар ман келген аьел агзалары да болмага болады, оларга да, Россия Федерациясына не себеп пен келгенин билдирген «деловой» яде «гуманитарлык» виза бериледи.
Аьр бир ерде тийисли шартларды тутып яшав бардырсанъыз, уйкынъыз да рахатлы болар.
Н.Каракаев,
Ногай районы бойынша Россия ОМВД-сынынъ начальниги
полиция подполковниги.
