Мектеблерде кайзаманда да окувшылар арасында ярыслар озгарганлар. Эсимде, биз де «Зарница» ойынларга баратаган эдик, мектебимиз волейбол, футбол ярысларда сынаскан, класслар ара «Кая, кызлар!», «Кая, кеделер!» конкурслар оьтетаган эди. Аьлиги заманда да балаларды патриотизм яктан тербиялавга, спорт пан кызыксындырувга уьйкен маьне бериледи. Соьйтип Терекли-Мектеб авылынынъ А-Х.Ш.Джанибеков атындагы мектебининъ окытувшылары да ислейдилер. Физкультура дерисининъ окытувшысы Адильхан Бегали увылы Койбаковтынъ айтувы ман, мектебте коьплеген спорт ярыслары, ойынлары оьтеди. Быйыл увыт айында «Кая, кеделер!» деген конкурс уьйкен класслар ара оьтти. Баьриси ярыста 8 команда сынасты.
Биринши орынды 11-нши «б» класс алды, экинши орынга – 11-нши «а» класс, уьшиншиге – 10-ншы «б» класс тийисли болдылар.
Навруз айдынъ басында «Кавыфсызлы тегершик» деген конкурс класслар ара оьтти. Конкурста 7 команда катнастылар, биринши орынга – 5-нши «в» класс, экинши орынга – 4-нши «а», 4-нши «в», 5-нши «а» класслар, уьшинши орынга – 4-нши «б» класс тийисли болдылар.
Халклар ара Хатын-кызлар куьнине багысланып, муниципаллык волейбол бойынша ярыслар оьтти. Кызлардан туьзилген командалар бек ийги ойын коьрсеттилер. Бу ерде ярысларды озгарувга салдарлы уьлис коскан спонсорларды да белгилейди Адильхан Бегали увылы – Терекли-Мектебтеги «Россельхозбанк» АО Дагестан регионаллык филиалынынъ косымша офиси (етекшиси А.Койлубаев), «Даир», «Азалия», «Пятница», «Мир свежести», «Арсенал», «Батыр» туькенлери, предприниматель Суьйиндик Кадыров, мектебтинъ выпускниклери Аскер Дильманбетов, Сабир Янгазиев.
Ярыста Нариман авылдан эки команда – окувшылар эм окытувшылар, А-Х.Ш.Джанибеков атындагы мектебтинъ окувшылары, Червленные Буруны, Орта-Тоьбе, Куьнбатар мектеблерининъ окувшылары катнастылар. Енъуьвшилер сырасында – А-Х.Джанибеков атындагы мектеб (биринши орын), Нариман авыл мектеб окувшылары (экинши орын) эм Червленные Буруны авыл мектеби (уьшинши орын). Баьри енъуьвшилерге кубоклар эм катнасувшыларга медальлер тапшырылды. Баскалай, уьш энъ де ийги ойнавшылар белгиленди – Мадина Ашимова (Терекли-Мектеб авылы), Изумруд Толубаева (Червленные Буруны авылы), Марьям Мурзагельдиева (Нариман авылы). Ярыстынъ катнасувшыларына Сый грамоталар эм таьтли баргылар тапшырылды.
Сондай шаралар тез-тез озгарылса, келеекте дени сав несилди оьстирермиз деп ойлайман.
Г.Абдулакимова.
Суьвретте: ярыстан коьринис.
