Ногай халкы арасында тувыл, онынъ да кырында аты ийги белгили болган ногай композитор, йырлавшы, дирижер, РФ эм ДР ат казанган маданият куллыкшысы, КЧР халк артисти, ана эм орыс тиллеринде шыккан уьш китаплердинъ авторы Яхъя Кудайбердиевти ДР Язувшылар союзы Россиядынъ Язувшылар союзына агза этип алмага ой-маслагат эткен эди. Москвадагы РФ Язувшылар союзына агзаларды кабыл этип алув бойынша комиссиясы онынъ документлерин ойласып карап, Яхъя Кудайбердиевти Россия Федерациясынынъ Язувшылар союзынынъ агзасы этип алмага токтаскан.

Соны ман янъыларда Дагестан Язувшылар союзынынъ правлениесиндеги Расул Гамзатов атындагы адабиат музе-йинде шатлыклы аьлде Яхъя Таймасхан увылына Россиядынъ Язувшылар союзынынъ агзалык билетин Дагестан Язувшылар союзынынъ секретари, ногай секциясынынъ етекшиси Анвар-Бек Култаев тапшырган.
Яхъя Кудайбердиев оьз ягыннан республикадынъ Язувшылар союзына эм сонынъ ногай секциясына разылыгын эм буьгуьнлерде ана тилинде янъы повестин язып биткенин билдирген.
З.Култаева.
Суьвретте: Я.Кудайбердиев эм А.Култаев.