Тарумов районынынъ Новодмитриевка авылында ногай ярыкландырувшысы Абдул-Хамид Шаршенбиевич Джанибековтынъ эстелигине багысланган шара уйгынланып оьтти. Байрамга келген конаклар, Новодмитриевка авылынынъ яшавшылары ярасык авыл паркында йыйылыстылар. Авылдынъ орамлары йыйыстырылып, авыл паркы шатлыклы ногай анъларына толган эди. Байрамга йыйылганларды Новодмитриевка авыл администрациясынынъ аькимбасы Рашид Манапов йылы кутлады. Кутлав соьзинде ол оьз ердеслерине аьдет-йорыклар, исте эм оьзлери ара анъламлыкты саклаганлары уьшин разылык соьзлерин каратты.

Баска болып, авыл яшавшыларын байрам ман ис ветераны Байрамгази Баймамбетов та кутлады.
Новодмитриевка авыл яшавшылары ман куванышты боьлиспеге конъысы Ногай районыннан артистлер де келген эдилер. Биргелес озгарылган концерт программасы ярык эм эстеликли болып оьтти. Байрамда ногай эм орыс тиллеринде йырлар йырландылар. Каравшылар аьр бир йырды уьйкен карс кагувы ман хош коьрип алдылар.
Байрамга келген конаклар ногай миллетининъ туьрли зияпетлериннен де таттылар. Авыл куьнининъ байрамына багысланып футбол турнири де уйгынланып оьтти. Спорт шарасында Новодмитриевка авыл командасыннан баска, Шешен Республикасыннан, Ставрополь крайыннан, Ногай эм Кизляр районларыннан командалар ортакшылык эттилер. Тиресуьвли куьресуьвде биринши орынды Новодмитриевка авыл команда бийледи. Ставрополь крайыннан келген командасы экинши орынга тийисли этилди. Уьшинши орынды Сары-Су авылыннан команда алды. Командалар кубок пан эм акшалай баргылары ман савгаландылар. Новодмитриевка авылыннан Муса Байманбетов ойын тамамында ийги ойнавшы деп белгиленди.
Соьйтип, байрам шатлыклы коьнъилде оьтти.
Э. Арсланбекова,
Новодмитриевка авылы.
Суьвретте: «Айланай» фольклор-этнографиялык биюв ансамблининъ катнасувшылары Новодмитриевка авылында байрам оьтуьв мезгилинде.