Шегерткидинъ кайдай зарарлы экенин айлак та бизим яклардынъ эгиншилери бек аьруьв биледилер. Сонынъ акында бурынгы йырларда да аз айтылмаган. Аьли 2016-ншы йылдан алып шегертки Бажиган бетлерден бизим район ерлерине де кирмеге йол тапкан эди. Сол йылдан алып аьр йыл сайын бу зыяншыга карсы патшалык оьлшеминде аз куллыклар юритилмейди.

Быйыл да тап сондай ислер юритилгени акында бизге «Россельхозцентр» ФГБУ Ногай боьлигининъ етекшиси Сейдали Союнов билдирди.
Онынъ айтувы ман быйыл язлыкта шегерткидинъ барлыгын тергев бойынша район бойынша 47 мынъ 500 гектар ерлер каралган эди. Солардынъ 20 мынъ гектарына ювык майданларда зыяншы барлыгы аянланган. Соны ман быйыл май-июнь айларында Бажиган, Терен-Куйы, Москва-хуторы деген ерлерде Ногай район авыл хозяйство боьлигининъ специалистлери начальниги Алибек Амановтынъ етекшилиги мен эм ДР Авыл хозяйство эм тамак-азык министерствосыннан йиберилген техника куьши мен кешеси-куьндизи ис юритип, баьриси 17 мынъ 210 гектар отлакларды эм эгин кырларын дарманламага уьлгиргенлер. Сол куллыклардынъ сырагысында шегертки саны коьпке азайганы белгиленген.