Оьткен тыншаюв куьнлери Терекли-Мектебтинъ Титов атындагы орамынынъ яшавшыларына уьйкен куьез бен оьтти демеге боламыз. Олардынъ орамында бир аьлемет балалар майданы ашылып, сол тоьгеректеги балаларга эм олардынъ ата-аналарына уьйкен завыклык куваныш аькелди. Сол куьнди олар коьп карадылар, туьрли туьсли шенъилшеклер, балаларга кыдырув, завыкланув алатлар турганда, боьтен де кызыклы болып баслаган эди. Бу куьн сол майданга балалар кирип, олардынъ мыратлары толдылар.
Титов орамында курылган балалар майданынынъ оьз тарихи де бар. Бу майданнынъ болувына оьзининъ уьйкен уьлисин авыл поселениесининъ депутаты Арслан Амирхан увылы Бакиев салган. Ол авыл депутаты болып сайланганлай ок, оьзи яшайтаган орамына балалар майданын этпеге мырат эткен эди. Буьгуьнлерде онынъ мырады толды.
Балалар майданынынъ ашылувына багысланган шарады Мадина Бийболатова ашты эм юритти. Майданды ашув ыхтыяры орам яшавшылары Руслан Кунтувганов пан кишкей кыз Аяна Оразалиевага берилди. Аьли балалар майданы курылган ер алдынгысы Динислам Зарманбетовтыкы эди. Ол Арслан Бакиевтинъ тилегин кабыл этип, балалар майданын курувга берген.
Майданнынъ курылувына «село Терекли-Мектеб» СП МО аькимбасы Зейдулла Курман увылы Аджибайрамов та оьз ыхтыярын берген эм коьмегин де эткен.
2019-ншы йылдынъ тамбыз айында Дагестан Республикасынынъ экономика министерствосы ман муниципаллык туьзилислери уьшин ерли инициативалар шарасы озаягы акында билдирилген эди. Сол шарада Арслан оьзининъ йигерлиги мен катнаспага токтасты, ога оьзи аьзирлеген проекти мен Дагестан Республикасынынъ экономика министерствосына бармага туьсти. Сол баславында ога оьз ярдамын Тарумов районыннан ис йолдаслары эткенлер, буьгуьнлерде оларга да Арслан оьз разылыгын билдиреди.
Сол майданнынъ болувына Арслан Бакиев коьп куьшин де, заманын да йиберди, буьгуьнлерде Аллага шуькир, майдан бар эм коьп йыллар узагында мунда балалар завыкланып заман озгараяклар эм разы болган яшавшылар Арсланнынъ атын ийгилик пен айтып та турарлар. Соны ман Арслан Бакиев Терекли-Мектеб авыл етекшиси Зейдулла Аджибайрамовтынъ коьмеги мен ДР экономика министерствосы уйгынлап озгарган шарада ортакшылык этип, 2 миллион акшалай баргыга тийисли болган, сол акшады олар бу балалар майданын болдырувга салдылар. Оннан баскалай, Терекли-Мектебтинъ «Победа» микрорайонынынъ яшавшылары ман 265 мынъ маьнет акша йыйналган эм «село Терекли-Мектеб» СП МО администрациясы ман 50 мынъ маьнет акша шыгарылды. Мине сондай куьш пен буьгуьнлерде Титов атындагы орамында балалар майданы ясуьйкеннинъ коьзин кувантады, балалардынъ коьнъилин коьтереди.
Шатлыклы шарада Титов атындагы орамынынъ куьезин боьлиспеге бу куьн «Ногайский район» МР администрациясынынъ аькимбасы Мухтарбий Аджеков, «село Терекли-Мектеб» СП МО аькимбасы Зейдулла Аджибайрамов эм сондай баскалар келген эдилер. Олар да оьз соьзлеринде авыл поселениесининъ депутаты Арслан Бакиевке оьз разылыкларын билдирдилер эм келеекте олар районымыздынъ, авылымыздынъ оьрленуьви уьшин куьшлерин аямаягын билдирдилер.
Йыйылганларды сондай шатлыгы ман районымыздынъ ямагат палатасынынъ председатели Эльмурза Саитов, сол орамнынъ яшавшысы, чернобыльшилер союзынынъ председатели Руслан Кунтувганов (топлар да савгалады), орам яшавшылары К.Куруптурсунов, А.Джумагишиев, сол тоьгеректинъ яшавшылары З.Ваисов, З.Кочеров кутлап, бу майданнынъ болувына куьш салган аьдемлерге разылык билдирдилер.
Арслан Бакиев те йыйылганларга савболсынын айтып, оьз мырадынынъ толганына суьйинип, бу балалар майданынынъ болувына коьмегин эткен сырттагы, Москвадагы ердеслерине оьз разылыгын билдирди.
Терекли-Мектеб авылынынъ Титов атындагы орамынынъ балалары завыкланып ойнайдылар, шенъилшеклер ушадылар, солар ман бирге саьбийлердинъ коьнъиллери де йогарыда.
Г.Сагиндикова.
