Дагестан Республикасынынъ Аькимбасынынъ куллыгын кесек заманга юритуьвши Сергей Меликовтынъ Ногай район орталыгы Терекли-Мектебке эм Орта-Тоьбе авылларына келип кетуьви буьгуьнлерде район ямагатынынъ эс этуьвининъ бас орынын бийлейди.

Ногай район администрациясынынъ Ямагат палатасынынъ председатели Эльмурза Союн увылы Саитов республика басшысынынъ Ногай районында болувы акында оьз ойын билдирди.
– Сергей Меликов муниципалитеттинъ социаллык объектлери, маьселелери мен тешкеруьвли танысты эм сол ерде ок та яваплы аьдемлерге соларды шешуьвдинъ йолларын аьзирлевди тапшырды. Бас деп сол соравлар санына район ерлерининъ кумланувы, коьшимли малшылык ерлерининъ маьселелери киредилер. Бу соравлар онынъ колтыклавы ман быйыл март айында Москвада Федерация Советинде Дагестан Куьнлери оьткерилген аьсерде коьтерилгенлер.
Белкиси, келеекте кайдай болса да бир аьлде Сергей Алимович пен бизим районнынъ кызыксынувларын эсапка алып эм Ногай шоьллигининъ кумланувына карсылык этуьв ниетте коьшимли малшылык ерлерининъ соравларын шешуьвдинъ йоллары акында хабарласпага амал тувар деп ойлайман.
Дурысында, коьшимли малшылык ерлерининъ яртысын кулланувдан тайдырып, сонда табиат заповедниги туьзилсе, аьруьв болар эди деп ойлайман. Бизим Ногай шоьллигимиз оьзининъ аьлемет оьсимликлери эм айванлар дуныясы ман кайтадан аьвелги кебине келсе экен!.. Ол алдын сондай эди ше. Буьгуьнлерде савлайы Сырт Кавказы бойынша шоьл заповедниги йок.
Республика етекшилери мен ойласылган республикадынъ, сонынъ санында Ногай районынынъ социал-экономикалык оьрленуьв программасын толы кепте макул коьремен. Сергей Алимовичке бизге заман тавып келгени, аьдемлер мен аьллескени, бизим районга эм халкымызга эс бергени эм колтыклаганы уьшин уьйкен разылыгымды билдиремен, – деген Ногай район администрациясынынъ Ямагат палатасынынъ председатели Эльмурза Саитов.
М.Ханов.