Оьрметли авылдаслар, «Шоьл тавысы» республикалык газетамыздынъ сыйлы окувшылары!
Сизи мен янъыларда шыккан «Об отгонных пастбищах Республики Дагестан на примере Ногайского района» деген китап пен байланыслы болган ясуьйкен маслагатым ман боьлиспеге суьемен. Маслагатымды кабыл этип аларсыз деп уьмит этемен.
Ногай шоьллигимизге багысланган бу китаптинъ авторлары бизим атланган йигитлеримиздинъ сырасыннан, олар: «Ногайский район» МР Депутатлар йыйынынынъ председатели Руслан Насыров эм Дагестан Республикасынынъ ат казанган юристи Амирхан Акманбетов. Ногай халкымыздынъ маьнели маьселелерин коьтерген йигитлеримизге машалла деп, оларга разылыгымды билдиремен эм халкына, Ногай элине туьз болган ниетлери яшавга шыксын деп уьстинликлер сагынаман. Йигитлеримиздинъ кыйынларын Кудайымыз савапка язсын эм оларга Оьзи арка тирев болсын деп тилеклер тилеймен, ИншаАлла!
Ногай шоьллигимиздинъ буьгуьнги аьлине каратылган китапте бек маьнели макалалар бар. Бир-неше макалалардынъ атлары ман сизди таныстыргым келеди. Китап авторлардынъ оьз ой-пикирлери мен язылган «От составителей» деген макала ман басланады. Оннан сонъ онынъ иштелигине артлы-артыннан «Краткая справка по истории административно-территориального деления Караногайского (Ногайского) района за 1922-2018 г.г.», «Об отгонных пастбищах», «Озера Большой и Малый Маныч», «Соленые озера Большой Маныч и Малый Маныч и включение их в особую охранную зону Ногайского района», «Протоколы, решения».
Бу китапте 2017-нши йыл 14-нши тамбыз айында болып оьткен ногай халктынъ Савлайроссиялык курылтайынынъ материаллары да бар: «Доклад председателя оргкомитета, председателя президиума Общероссийского съезда ногайского народа Рустама Адильгереева», «Выступление Аджиковой Лейлы Амирхановны», «Резолюция общероссийского съезда ногайского народа», «Решения 6-ой очередной сессии Собрания депутатов муниципального района «Ногайский район» Республики Дагестан 6-го созыва». Солардынъ бириси «Степные горцы ногая: земля раздора и вопросы Васильеву» деген макала.
Шоьллигимизге багысланган макалалар терен ой ман, биревдинъ де хаьтерине тиймей, шайытлама материалларга таянып язылган макалалар. Китапти окысанъыз, аявлы авылдасларым, оьзи-нъиз анъларсыз йигитлеримиз шыгарган китаптинъ шоьлимиз бен байланыслы терен маьнесин.
Бу ак юректен туьз ниет пен язылган макаламда сизи мен йигитлеримиздинъ ойлары тувдырган маслагатларым ман боьлиспеге суьемен эм эндиги де бир кере меним маслагатларымды кабыл этип аларсыз деп уьмит этемен, ИншАлла!
Бириншилей, бу китап ногайымнынъ кайбир уьйинде болмага тарык, неге десе китапте коьтерилген маьселелер ата-бабаларымыздан калган Ногай шоьллигимиз бен байланыслы: тувган еримизди кумлакка айланувдан саклав, сога кайтарып ие болув эм сондай неше туьрли маьнели маьселелер.
Экиншилей, китапти коьп аьдемлер окыган сонъ, узакка калдырмай, соны ман байланыста «Ногайская степь – житница не только Ногайского района, но и всего Дагестана. Как сохранить ее от надвигающейся экологической катастрофы?» деген аты ман Савлайроссиялык конференциясын озгармага керек болады.
Уьшиншилей, конференция оьткерилгенше, районнынъ экология комитети, республикадынъ авыл хозяйство министерство специалистлериннен, ямагатка яны авырыйтаганлардан ортак комиссия туьзбеге, Ногай шоьлдинъ аьлин шегип карамага тарык болады.
Доьртиншилей, 2017-нши йыл ногай халктынъ курылтайын озгарган Уйгынлав комитетине бу соравга яны авырувшы авылдасларымызды да янъыдан косып, «Ногай халкынынъ миллет комитетин» курсак ийги болар эди. Бу «Миллет комитетине» Сибирьде, Москвада, Москва областинде эм баска регионларда яшайтаган ногай ердеслеримизди де киргистпеге, неге десе ногай халкымыздынъ яшавы ман байланыслы маьселелери аз тувыл.
Бесиншилей, Ногай шоьлимизге ийгилик йорайтаган ниетлеримиз яшавга шыгарылганын суьетаган болсак, «Элде, динде, тилде бирлик!» (Эдиге ата-бабамыз), «Ялгыз ат шавып юйрик болмас» деген ата-бабаларымыздан калган айтувларды эсимизде саклайык эм соларды туьз ниетимиз эм ак юрегимиз бен этилген, ислеримиз бен аклайык.
Бу макаламды окыганларга, маслагатларыма маьне бергенлерге разылыгымды билдиремен эм мени асыраган, асыл эткен ногайыма тилеймен:
Шоьлимиз бизим кемемиз,
Кемедеги оьзимиз.
Бир болсыншы дайым да
Тилегимиз, соьзимиз.
Ногайыннан коьп яхшылык коьрген, асыраган, асыл эткен ногайына Алла буйырткан шаклы алал кыйыны тийген:
Ахмат Арсланов.
