Ногай районында зейинли эм кайратлы яслар аз тувыл. Ясларымыздынъ кайратлыгын эм талабын олардынъ туьрли конкурсларда катнасувы, солай ок эткен ислери шайытлайды. Бизим ясларымыз алдында баьри эсиклер ашык. Олар оьзлерининъ билимин эм куьшин илми, саният эм баска тармакларда коьрсетер эм кулланар уьшин элимизде коьп куллык этилинеди.

Коьп ясларымыз Россиядынъ туьрли калаларында аьрекетлейдилер, боьтен де олардынъ оьзининъ тувган ери мен бактысын байланыстырувы, тувган Ногай шоьлининъ буьгуьнгиси эм келеектегиси уьшин яны авырувы, кыйын аьлди туьрлендирмеге шалысувы эм эс этуьви куьезлендиреди. Айтпага, янъыларда Якуб Уразакаев энъ де ийги журналистлик ислер коьрсетилген «Бирге. Медиа. Онлайн» савлайроссиялык конкурсында катнаскан. Бу конкурс бойсынмаслы радиоберуьв фонды ман уйгынланган. Якуб Уразакаев «Шоьл куткарувшылары» деген репортаж уьшин «Лучший материал о бережном потреблении» номинациясында Москва каласында «Бирге медиа» фестивалинде сыйлы экинши орынды бийлеген.
Йогарыда белгиленген конкурсында катнасар ниет пен элимиздинъ туьрли калалары эм районларында яшаган 1500 аьдем аьризе йиберген. Олар йиберген 1500 ислерден 430-зы сайланып алынган. Конкурс катнасувшыларынынъ тек 40-кы финалга шыкканлар, олардынъ сырасында бизим ердесимиз Якуб Уразакаев те бар.
«Бирге медиа» фестивали 4 куьн узагында болган, 6-7 номинацияларындагы туьрли ислер каралган. Якуб Уразакаев оьзининъ репортажында Ногай шоьлининъ кумлы ерлерин коьрсеткен эм мунда яшаганлардынъ сырасында сол кумлы ерлердинъ бир кишкей кесегин бавга айландырганлары расатаганы акында хабарлаган. Якуб Уразакаевке 2-нши дережели диплом эм «Пятница» телеканалыннан савга тапшырылган.
Кайратлы ердесимиз Якуб Владимирович бир неше кере оьзи алган художестволык фотосуьвретлерининъ выставкасын уйгынлаган. Ол суьвретлерин «Россиядынъ энъ де ийги фотосуьвретлери» деген конкурсына йиберген. 2012-нши йылда озгарылган сол конкурста бизим яс фотосуьвретлери мен финалга шыккан. Белгиленген выставка элимиздинъ туьрли калаларында эм онынъ тысында коьрсетилинген, Якуб Уразакаев документальлик фильмлер уьстинде каьр шегеди. Ол «Шоьл тавысы» республикалык газетасынынъ бас редакторы Эльмира Кожаева салган «Кадрия» документальли-художестволык фильмининъ монтажеры эм «Алданганлар» документальлик фильмининъ оператор-монтажеры болган.
Солай ок яс йигит эл кезбеге суьеди. Ол Арктикада, Ак тенъиздинъ эм Тихий океаннынъ аралларында, Алыстагы Куьнтуварда, Сибирьде болган. Дуныядынъ туьрли муьйислерининъ ярасык ерлерин коьрип, суьвретке алып, ол келеекте этеек исине куьш алады. «Мага эл кезуьв оьзимнинъ тувган Ногай шоьлимди эм халкымды тагы да куьшли анъламага, билмеге эм яратпага ярдам этеди, коьп затка баскалай карап баслайман», – дейди Якуб. Ястынъ сондай соьзлери меним эсимде эм юрегимде калды. Онынъ ногай халкына эм тувган ерине суьйими бу соьзлерин оьктемлик пен айтувында аян сезилди. Тагы да Якуб Уразакаев оьзининъ атасы Ногай шоьлдинъ уста деген фотосуьвретшиси Владимир Уразакаевке Ногай районынынъ бурынъгы замандагы яшавын коьрсеткен суьвретлерди, Ногай фотоархивин йыйнамага ярдам этеди. Якуб Уразакаевтей, халкынынъ келеектегиси акында ойлап, бурынъгысы ман кызыксынганлар коьп болса экен.
Н.Кожаева.
Суьвретте: Я.Уразакаев.