Ногай районынынъ, Терекли-Мектеб авылдынъ сыйлы яшавшылары!

Бизим тувган еримиз – Ногай шоьллиги бурыннан алып коьшпели ата-бабаларымыздынъ эски юрты, сав дуныяга таралып яшайтаган халкымыздынъ орталыгы, тарихте ювсан ийиси кокыган Дешт-и-Кыпшак даладынъ бир кесеги деп саналады. Сол себептен, районымыздынъ коьрки, боьтен де тазалыгы – бизим юзимиз эм намысымыз. Бизге келген конаклар бизи мен бирге шоьлимизди де коьредилер.
Болса да, сога да карамастан, арамызда «тек меним уьйим, азбарым таза болса болады, орам да, авыл да мага авара тувыл», – деп ойлайтаганлар аз тувыл. Олар оьзлерининъ уьйшилик кокысларын, курылыс материалларынынъ калдыкларын карсы келген ерлерге тоьгедилер. Сырагысында бизим авыллар эм айлак та район орталыгы – Терекли-Мектеб авылы эм сонынъ тоьгереги, кубыладагы айлангыш йолдынъ ювыгы онда-мунда тоьгилген кокыслар ман кокып ятыр. Бу аьл бизди бек эрши этип коьрсетеди, йолдаслар. Арада бир оьткерилетаган субботниклер де сол маьселеди толы кепте шешпейди: тазаланган ерлерге тагы да янъы кокыс уьйимшиклери тасланады.
Соны ман бирге кайбир авыл яшавшылары оьзлерининъ уьйлериндеги кир канализация сувларын район орталыгынынъ иши мен оьтетаган дренаж татавылына йиберип койыптылар. Сол татавыл топырактагы ашшылыкты, артык сувларын тайдырув уьшин казылган. Биз канализация сувларымыз бан соны кирлеймиз. Сол сувдан авыл яшавшыларынынъ уьй айванлары да ишедилер. Биз аьдем болсак, бу заттынъ акында ойланмага керекпиз.
Аявлы ямагат! Эндигиден армаган кимлер оьз кокысларын карсы келген ерлерге тасласа, оьз уьй канализационлык сувларын дренаж татавылына йиберсе, оларга уьйкен штрафлар салынаяк. Авыл иши мен рейдлер оьткерилеек эм куьнали болганларга каты дембиси этилинеек.

РФ МВД-нынъ Ногай районы бойынша боьлиги.