Яшав оьмиримиз бойынша кайдай аьдемлер мен де расамыз, йолыгысамыз, аьллескен заманларымыз да коьп боладылар. Солардынъ баьриси де эсинъде калмайды, а болады аьдемлер, кимлер мен бир кере соьйлесенъ де, коьп заманга эсинъде калатаган.
Бизим Борис Абдулла увылы Агайгельдиев пен биринши танысувымыз 1986-ншы йылда болды. Оьзимиздинъ аьел ансамблимиз бен Черкесск каласында концерт беретаган шагымызда ол бизге оьзининъ разылык соьзин айтып, уьстинликлер йорады. Соннан бизим катнасымыз да басланды. Ол бизим уьйимизде де бир неше кере конак та болган.
Борис Агайгельдиев оьзининъ яшав оьмирин халкына багыслады, ямагат-политикалык яшавында белсен катнасатаган эди. Биз де аьелимиз бен онынъ уьйинде де коьп кере конак болганмыз. Агайгельдиевлердинъ аьелинде биз болмай, бир яхшылык та оьтпейтаган эди. Сол себептен Агайгельдиевлердинъ аьелин бек аьруьв таныймыз.
Бористинъ анасы Рабиятты бек ярасык эм танъ аьдем деп таныдык, Майрат тетейининъ, Кемат нагашакасынынъ аьдемшиликлерининъ шет-кыйыры йок эди. Борис Абдулла увылынынъ бек аьруьв, конаксуьер хатыны Фатимады да бек ювык таныйтаган эдик. Кашан барсак та, ол бизди даьмли аслары ман, ашык коьнъили мен йолыгатаган эди.
Коьзимиздинъ алдында Агайгельдиевлердинъ увыллары Расул ман Эльдар да оьстилер. Атасы ман анасы оларга тийисли тербия да, билим де бермеге шалыстылар.
Борис оьз халкынынъ алал увылы эди. Ол 1988-нши йылда Россия Федерациясынынъ Депутатлар советине кандидат та болды. Сол заманларда мен Адыге-Хабль районынынъ сайлавлар комиссиясынынъ председатели эдим. Сайлавлар кампаниясы юрген шакларда мен Борис Абдулла увылы ман тар байланыс туттым. Онынъ кайтип куьшли халкын суьетаган аьдем экенин де анъладым. Борис Агайгельдиев Карашай-Шеркеш патшалык техникалык академиясынынъ биринши проректоры, ассистенти, тамада окытувшысы болып ис аьрекетин де бардырды. Оьзи илми йолында докторлык дережеге де еткен. Онынъ илми куллыклары востоковедение мен байланыслы эди. Борис куьнбатар эллерине, оьз элине баргандай болып, баратаган эди.
КЧР Халк Йыйынынынъ депутаты, экономика илмисининъ кандидаты, социаллык илмилер академиясынынъ агзасы, Россиядынъ техникалык илмилер академиясынынъ Президиумынынъ агзасы, КЧГПУ-дынъ сыйлы докторы, «Бирлик» ямагат-политикалык биригуьвининъ биринши уйгынлавшыларынынъ бириси эди Борис Абдулла увылы Агайгельдиев. Сол кадер етимислери болган аьдем бир де басын коькке коьтермеген эм оьзининъ уьйкен аьдемлигин саклап билген. Борис Абдулла увылы яс несилге де коьп коьмегин эткен. Ол билимли яс аьдемди коьрсе, оны колтыкламага шалысатаган эди.
Ызгы кере биз Борис-агай ман Черкесскте шаир Аскербий Киреевтинъ 60 йыллык мерекесине багысланган кешликте 1998-нши йылдынъ 17-нши февралинде коьристик. Сол йылдынъ язлыгында Борис Абдулла увылы Агайгельдиев бу дуныядан кешип кетти. Коьп кере оны эсиме аламан. Онынъ акында язбага да коьп кере шалысканман, тек аьруьв билген, янынъа якын болган аьдем акында озган заманда язув енъил болмайды. 2019-ншы йылда онынъ дуныядан кешип кеткен куьнинде «Эдигеден баскалыгынъ йок» деп ога багысланган ятлавым тувды. Ол халкымызга аз куллык этпеди.
Сондай ийги аьдемнинъ яны буьгуьнлерде еннетте деп бек сенемиз, бир куьн де мутпаймыз, коьзимиздинъ алдында яп -ярасык юзи, юрегимизде эткен ийгиликлери, коьрим алгандай ярык яшавы…
Р.Утемисова.
