Муса Курманали увылы Курманалиев (1894-1970 йыллар) эм Зеид Абдул-Халил увылы Кайбалиев (1898-1979 йыллар) – ногай халкымыздынъ ярыкландырувшылары, ямагат аьрекетшилери, халк окытувшылары, ана тилинде баслапкы совет окув китаплерин, ногай мектеблери уьшин программалар эм пособиелер туьзуьвшилери боладылар.

Ногай ян-коьнъил маданиятынынъ тарихинде эм миллет ярыкландырувшылар тармагында олар оьз атларын солай ок уллы ярыкландырувшымыз Абдул-Хамид Шаршенбий увылы Джанибековтынъ ювык дослары эм бир исти юриткен йолдаслары деп те калдырганлар.
Муса Курманалиев пен Зеид Кайбалиев экеви де алдынгы Ставрополь губерниясынынъ Ашыкулак ставкасынынъ Кара-Тоьбе авылында (ол замандагы ногай билимлендируьв орталыгы болып саналган) тувып-оьскенлер.
Муса Курманалиев, оннан баскалай, адабиат аьрекети мен де каьр шеккен эм уьйкенлер мен балалар уьшин бир неше поэзия йыйынтыкларын язып калдырган. Совет ногай адабиатында онынъ «Булытлар шашылды» деген поэмасы кенъ белгили эм классикалык шыгармага айланган.
Поэзия эм проза шыгармаларын, солай ок оьз заманында Зеид Кайбалиев те язган. 1931-нши йылда Муса Курманалиев пен Зеид Кайбалиев косылып билимнинъ куьшин коьрсетуьв ниет пен «Мектеб пайдасы» деп аталган агитационлы-ярыкландырувшы пьесасын да язганлар. Пьеса сол йылларда бек маьнели болганга, ногай авыллардагы мектеблерде коьп кере сценага салынып коьрсетилген.