Инсаннынъ бактысы тувган заманда кайдай болаягы манълайында язылады деп неше кере де эситкенмиз. Сол да дурыс, бактыдан кайда кашып кутылаяксынъ.
Орта-Тоьбе авылда яшайтаган Теминдаровлардынъ аьелин кишкей заманнан алып билемен десем оьтирик болмас. Руслан эм Оьтебике Теминдаровлар биз мектебте окыйтаган заманда аьел курдылар, Оьтебике Язманбет кызы меним окытувшым эди. Теминдаровлар – татар миллетли, ногайлар арасында яшап калганга коьре, аьвлетлер ногайша соьйлеп, кызлар ногай йигитлерге барып, яслар ногай кызлар алып, тар байланысып калганлар. Эгер Теминдаровлар эки миллетли аьел болган болса, буьгуьнлерде олардынъ увылы Аслан орыс миллетли кыз алып, аьелге тагы да бир миллет косылды.
Аслан Теминдаров эм Нина Фролова Саратов каласында медициналык академиясында бирге окыганлар, олардынъ факультети бир, тек окув куьплери баска эди. Соьйтип, эки яслар арасында суьйим сезими тувып, олар аьел туьздилер.
Эки туьрли миллет, эки туьрли дин, бу затлар суьйимге бир заманда да буршав болмадылар. Нина ян досынынъ тек тукымын алып калмай, ногай аьдетлерин, бизим ерде тувып-оьскендей болып тутады. Явлык байлав, ясуьйкенлерге соьйлемев, оларга сый этуьв, миллет аслар асув – бу баьри аьдетлерин де Теминдавровлардынъ келини тутады. Мен ойлайман, ол бу аьелге оьз уьйим деп келген.
Яслар медакадемияды битирип, Москва каласында яшайдылар, экеви де врач болып куллык этедилер. Теминдаровлардынъ аьелинде увыл тербияланады – Адлан. Тетеси мен атасында ол яй айларында келип, турып кетеди. Мен ойлайман, келеекте ол тамыры тарткан Ногай шоьлин юреги мен суьйип, кенъ данъылдынъ сокпаклары ман кыдырмага суьер. Белки, ога ата-бабалары турган ерде яшамага бакты буйырар.
Бизим элимиз – коьп миллетли ер. Сондай туьрли миллетли аьеллер туьзилсе, халклар ара дослык та берк болар эди. Шынты дослык болган ерде, тынышлык та, макулласув да болар.
Г.Бекмуратова.
Суьвретте: Теминдаровлардынъ аьели.