Кайсы заманларда да элимизде Аталыгын явдан йигитлерше коршалаган эр кисилер болганлар. Бизим аьдемлер оьз ерин душпаннан коршалаятып, артка бир де таймаганлар. Уллы Аталык согысы йылларында бизим атайларымыз нацистлерге элимизди алмага бермегенлер. Буьгуьнлерде, сол кан тоьгисли эм баьтирлик оьзгерислер болганлы 80 йыллар озган сонъ, ветеранлардынъ уныклары эм немерелери нацизмге карсы эм эли – Россияды коршалавга турдылар.
Бизге бек авыр эм соны ман бирге оьктемли ясларды, биревлердинъ увылларын, аталарын, ян йолдасларын йолга салмага. Аьли олар – Россия Аьскерининъ йигитлери, толы болмаган мобилизация бойынша кардаш халкын коршаламага шакырылганлар. Буьгуьнлерде Элимиз оьзининъ данъклы увылларынынъ коршалавында керексинеди. Оьзининъ Элин, халкын, ердеслерин, кардаш-ювыкларын коршалавдан йогары мырат йок. Кыйынлы, сынаган заманлар келдилер, эм Аталыгымыздынъ йигерли йигитлери оьз япсарларын коршалавга турдылар. Оьз элин шынты суьювшилер оьз-оьзиннен болмайдылар, оларды аналар тербиялайдылар.
Россия хатынлары ман бирге Ногай районынынъ хатынлары да оьзлерининъ увылларын йолга салдылар. Нариман авылынынъ яшавшысы Гульфира Абдулбариева эки кеделерин – Русланды эм Исламды йиберди. Онынъ уьйкен кедеси Руслан Абдулбариев Владивостокта службасын бардырган. Ол механик-водитель болып аьрекетлеген. Руслан Бегалиевич Аьскер сырасыннан тувган ерине кайтканлы 8 йыл болады, а онынъ иниси Ислам уьйине бир неше ай артта кайткан. Ол Уссурийск каласында сапер аьскерлерде службасын бардырган. Руслан коьп йыллар артта аьел курган, Исламнынъ да аьели бар.
Агалы-инили кеделер бу йылдынъ кырк кийик айынынъ 23-нши куьнинде колына повестка аладылар. Экинши куьн эртерек оларга йолга туьспеге керек болады. Соьйтип, олар ата-анасы, кардаш-тувганлары эм авыл эли мен аманласып, энъ де сыйлы борышты толтырмага кетедилер.
Оьзек те, аналарга бек кыйын, олардынъ юреклери сызлайды, ама анълайдылар аналар, олардынъ балалары – Эл коршалавшылар. Олар оьзлерининъ борышын толтырмага тийислилер. Олар – россиянлылар, дагестаншылар, ногай баьтирлер. Руслан эм Исламнынъ анасы Гульфира да кайтип кыйналса да, кайтип юреги сызласа да, кеделерине тилек тилеп, йолга салады. Аьли де, онынъ ойлары увыллары ман, аьр бир тынысын алаятып, анадынъ юреги балалары уьшин кыйналады. Ким аьше, элимиздинъ увыллары, элимиздинъ хатынлары алал кыйынын салып тербиялаган йигитлер коршаламаса, ким коршалар явдан элимизди.
Аьскершилердинъ аналары… Олар оьз увыллары ман бирге йигитлик этедилер. Аналар явдынъ танкларын якпайдылар, душпан турган ерге янаяткан самолетлары ман туьспейдилер. Хатын-аналар шынты йигитлер тербиялап-оьстирип, элин явдан коршаламага йолга саладылар. Сонъ кешеси-куьндизи мен арымай-талмай оларды куьтип турадылар.
Кетип бараятып, Руслан ман Ислам анасына кыйналмасын деп тилейдилер. Гульфира Абдулбариева увыллары Элин коршалавга шыкканлары уьшин оьктемсимеге тийисли.
Биз оьз ердеслеримиз бен, Ногай шоьлдинъ данъклы йигитлери мен оьктемсиймиз. Олар тувган ерининъ сыйын туьсирмеегине шекленмеймиз. Биз сизди, йигитлеримиз, енъуьв мен, тез арада аман-эсен кайтканынъызды куьтемиз.
Н.Кожаева.
Суьвретте: Г.Абдулбариева увыллары Руслан эм Ислам ман.
