Терекли-Мектеб авылдынъ Кадрия атындагы орта мектебинде Халклар ара тувган тилдинъ куьнин сав мектеб пен белгилев коьптен ийги аьдет болып токтаган. Мектеб етекшилери, окытувшылар, окувшылар баьриси де тувган тилдинъ окытув эм тербиялав маьнесине багысланган шараларды бир ниет пен коьнъилленип оьткередилер.

Соьйтип, быйыл да мунда туьрли байрам шаралары болып оздылар эм соларда 2-9-ншы класслар окувшылары катнастылар. Балалар ногай шаирлери Кадриядынъ, Мурат Авезовтынъ, Гульфира Бекмуратовадынъ, Джамиля Аманбаевадынъ эм баскалардынъ ятлавларын окыдылар. Мектебте уьйкен маьне авызлама халк яратувшылыгына бериледи. Окувшылар такпаклар эм айтувларды, санамакларды яттан айттылар, юмаклар, ребуслар шештилер, бир неше бала ойынларды, халк аьдет йорыкларын коьрсеттилер.
Эсте калгандай аьруьв ойланып туьзилген шараларды 2-нши «а» классынынъ (етекшиси Земфира Уразаева), 3-нши «б» классынынъ (етекшиси Эльмира Абубекерова), 8-нши «б» классынынъ (етекшиси Насипхан Хасбулатова), 9-ншы «а» классынынъ (етекшиси Мархаба Мансурова), 9-ншы «б» классынынъ (етекшиси А.Баякаева) окувшылары оьткердилер.
Тувган тилдинъ аьлиги яшавда туткан орыны эм маьнеси акында, соны саклавга шакырув ман балаларга баслангыш класслар окытувшысы Э.Абубекерова, район билимлендируьв куллыкшыларынынъ профкомынынъ председатели Медина Гапарова, «Шоьл тавысы» республикалык газетасынынъ политика боьлигининъ редакторы, поэт Магомет-Али Ханов, Кадрия мектебининъ директорынынъ окытув-тербиялав бойынша орынбасары Зоя Оракова ийги йоравларын айттылар. Олар окувшыларга, окытувшыларга разылыгын билдирдилер, оьсип келеяткан несилди окытувда эм тербиялавда тувган тилдинъ маьнели орынын белгиледилер. Аталардынъ тилин уьйрене келип, бала шактан бир-бириси мен ана тилинде аьллесип, балалар сонынъ байлыгы, оьз ата юртына эм Тувган Элине терен патриотизм сезими мен тербияланып оьседилер дедилер шыгып соьйлегенлер.
М.Юнусов.
Суьвретте: Кадрия мектебинде тувган тилине багысланган шарада.