Россия эм дагестан аьеллерининъ коьбисинде Тувган Элди коршалав кесписин энъ де керекли аьскер эстафетасы кебинде атайлардан балаларына беруьв аьдети эндиги данъклы аьдетлердинъ бириси болады. Сондай аьеллер бизим Ногай районында да бар. Солардынъ бириси – Терекли-Мектеб авыл яшавшылары Ярикбаевлердинъ аьели.
Ярикбаевлердинъ уьйкен атайы Саллыбай Уллы Аталык согысынынъ белсенли катнасувшысы эди, ол Сырт Кавказдан тувган совет ерлерин, Украинады, Венгрияды эм Куьнтувар Европадынъ бир неше эллерин немец-фашистлерден босатып, Берлинге дейим еткен. Согыс йылларында коьрсеткен эрлиги уьшин бир неше орденлер эм медальлер мен савгаланган. Ярикбаевлердинъ аьелинде аталарынынъ йигитлиги мен дайым да оьктемсигенлер эм сонъында тынышлык заманында онынъ баьри увыллары Заурбек, Алибек эм Каирбек тувган Аталыгы алдында оьзлерининъ конституционлык борышын тийисли кепте толтырганлар.
Бизим аьлиги аваралы, сынавларга толыскан аьсерде Тувган Элди коршалав борышы эндигиси Саллыбайдынъ уныгы Арсен Заурбек увылына коьшти, эм ол буьгуьнлерде контракт бойынша Россияга янъыларда кайтадан косылган ДНР еринде юритилип турган специальли согыс операциясында катнасатаган реактивли артиллерия аьскеринде куллык этеди.
Арсен Ярикбаев Ногай районынынъ орталыгы – Терекли-Мектеб авылында тувып-оьскен. 2008-нши йылда Абдул-Хамид Джанибеков атындагы орта мектебти окып кутарган. Сол ок йыл Пятигорсктеги патшалык техникалык университетининъ юрист факультетине окувга туьседи. 2011-нши йылда ол Россия Аьскер сырасына эр борышын толтырмага кетеди. Аьскерден кайткан сонъ, йылдан артык заман Терекли-Мектебтеги АТС-те ислеген. Сонъында 2015-нши йылда контракт бойынша Сахалинде орынласкан реактивли артиллерия аьскерининъ сырасына куллык этпеге йол алган. Былтыр июнь айында 6 артиллерия расчетларын, солардынъ бирисинде куллык этетаган Арсен Ярикбаевти де Сахалиннен Украинага йибередилер. Бир айдан оларды ДНР ерине киргисткенлер, эм сол куьннен алып яслар уьшин специальли согыс операциясында катнасатаган россия аьскерлерининъ сырасында шынты дав иси басланады.
Буьгуьнлерде Арсен ата юртына кесек заманга отпускка келген эм, онынъ хабарына коьре, олар согыс исинде «Град» эм «Ураган» деген реактивли артиллерия установкаларды кулланадылар. Россия артиллеристлери дав юрип турган шакта бизим аьскерлердинъ алдыга барувын коьтергишлейдилер эм, Украина аьскерлери алдыга юрип баслагандай болса, олардынъ артиллериясынынъ атувларын иркедилер.
«Басында, коьбисинше, коршаланув согыслар юриттик, октябрь айынынъ ызында, ноябрьдинъ басында бизим аьскерлер, душпан яхшы этип беркиткен авыл-калаларды босата берип, куьннен-куьнге алдыга барып басладылар», – деп эскереди Арсен Ярикбаев.
Арсен, баска согыс катнасувшыларындай, коьп соьзсиз, дав акында соьйлемеге аз суьетаган яс аьдем, болса да, мен онынъ шынты йигит юрегинде олар согыста болган куьнлерде туьзилген берк фронт дослыгы уьшин оьктемлигин сезбей болмадым. Айтпага, буьгуьнлерде олардынъ тыпак артиллеристлер аьелинде баьри де кавга сынавларын орыслар, тува, бурят миллетли, уьш дагестаншылар: табасаран эм эки ногай – ол эм Арсен Махмудов тенъ боьлиседилер. Олардынъ артиллерия дивизионын соны ман бирге йогарыдагы аьскер командованиеси ийгилердинъ бириси деп биледи. Буьгуьнлерде сержант Арсен Ярикбаев артиллерия расчетынынъ командири, аьскершилик борышын коьримли кепте толтырганы эм йигерлиги уьшин бир неше кере разылыклар алган эм янъыларда сол себептен уьйине отпускка йиберилген.
Онынъ анасы Курасхан Джумагельдиевна 40 йылга ювык заман А-Х. Джанибеков атындагы орта мектебинде окытувшы болып куллык эткен, ызгы йылларда ол эндигиси бу, районымыздынъ негизли билимлендируьв учреждениесининъ коллективин басшылайды. Мектебте окувшыларды патриотизм яктан тербиялав иси ийги дережеде юритиледи. Бу маьнели тема бойынша коьп шаралар оьткериледи. Мектебтинъ айырым выпускниклери: Ибрагим Нургишиев, Рамберди Оразниязов, Джавад Мамутов, Рашид Кульчиков, агалы-инили Тангаевлер аьлиги заманда контракт эм мобилизация эсабында ДНР эм ЛНР ерлеринде оьткерилип турган специальли согыс операциясында белсенли ортакшылык этедилер.
Мектебти окып битирген Амирхан Мурзагельдиев былтыр октябрь айындагы согыслардынъ бирисинде, оьзининъ фронт йолдасларын явдынъ отыннан ябып, йигитлерше ян берген. Сондай баьтирлиги уьшин ол «За кровь и храбрость» деген орденге тийисли болган.
Ис аьрекетим бойынша эм мектеб йылларымызда бир класста окыган йолдаслар эсапта мага Арсеннинъ анасы Курасхан Джумагельдиевна ман арада бир аьллеспеге туьседи. Элбетте, ол кыскаяклы, ана болган сонъ, увылы уьшин навасызланмай болмайды, ама соны ман бирге ол да Россия бизим баьримиздинъ ялгыз бир ортак элимиз эм, буьгуьнлерде сонынъ бактысы эм суверенитети сынавларга йолыгып турганда, аьр ким де Аталыктынъ танълагысын эм бойсынмаслыгын якламага керегин аьруьв анълайды.
М.Ханов.
Суьвретте: Арсен Ярикбаев.
