Украина еринде урыслар юретаганлы аз деп те, коьп деп те айтып болмаймыз. Сол алты айдан артык заман ишинде не шаклы аьдемлердинъ бактылары туьрленди, аьскершилердинъ, ерли яшавшылардынъ болсын, яшав оьмирлери уьзилгенлер де аз тувыл. Кайдай урыслар болса да, аьдем яшавын уьзбеген ер болмаган эм болмаяк.
Бу куьнлер Россия Федерациясына уьйкен кавыфлык тувган заман деп айтпага да болаяк. Украина япсарларында, кимнинъ кызыксынувын яклайтаганы да белгисиз болган, оьзлерин кул этип куллантып койган аьдемлер бизим элге шапкынлык этип, зыян келтирип турылар. Донбасс болса, аьли урыслардынъ энъ де ортасында турган йигит кала болады, а аьскершилер мен мобилизованный эр кисилер болса, оьз элининъ кызыксынувын коршаламага борышлылар.
Аьлиги заманда Россия Федерациясынынъ сырасына кирген Луганск эм Донецк Республикаларын, зорлыкка калган тынышлы яшавшыларды коршалавга шыкканлар араларында бизим ердеслеримиз, авылдасларымыз, кардашларымыз да бар. Солардынъ ишинде оьз ыхтыярлары ман кеткен яслардынъ атлары уьйкен оьктемлик пен айтылады, аьскер комиссариаты ман шакыртылганлар да оьз йигерликлерин коьрсетип, ийги атка тийисли боладылар. Кайтип кеткен болса да, сондай аьскер урысларында катнаскан аьдемлерди биз баьтир деп санаймыз. Элбетте, сондай эр кисилер элди, сонынъ ишинде уьйде калган аналарын, хатынларын, савлай кыскаяклыларды да коршалавшы деп айтпага боламыз.
Аьскер комиссариаты ман Украина еринде озатаган специальли операциясында Терекли-Мектеб авыл яшавшысы Рамберди Алимурза увылы Оразниязов буьгуьнлерде катнасады.
Россия Федерациясынынъ Президенти Владимир Владимирович Путин уьстимиздеги йылдынъ кырк кийик айынынъ 21-нши куьнинде айырым мобилизация акында билдируьв эткенин билген Рамберди:
– Эгер мени шакырсалар, мен артыма да карамай, Элди коршалавга бараякпан, – деп анасына айткан болган.
Анасы Сыйлыхан билдиргенлей, ушыны ман да ол шакырганлай ок, сол шакырувды кабыл этип алып, эр борышын толтырувга асыкты. Буьгуьнлерде Рамберди Крым еринде аьрекетин бардырып туры.
Анасы Сыйлыхан Карасай кызынынъ хабарлавына коьре, Рамберди буьгуьнлерде Украина еринде болатаган урыслар акында хабарламайды. – Мен увылымнынъ алган карары ман бу ерде муькир боламан. Эгер Элди сондай яс йигитлер коршаламаса, ким коршаламага керек. Оьзек те, кыйналаман, Алладан тек ден савлыкты, явдынъ отыннан саклавды тилеп тураман, кайда да бир Аллага сенемен, – дейди Сыйлыхан-абай.
Рамберди Оразниязов Ногай районынынъ Терекли-Мектеб авылында тувып-оьскен. Онынъ яслыгы, балалыгы биревдикиннен артык яде кем деп айтып болмаймыз. Мектеб, оннан сонъ автокоьлик айдавшы курслары, Россия аьскер сыралары, куьнле-куьнлик яшав оьте береди.
Рамберди аьскер сырасында иш ислер боьлигинде кызмет кылган эди. Баслап, Орел каласында, сонъында Московская областининъ Солнечный поселогында эл алдында борышын толтырувды тамамлайды. Сол заманлар тынышлы эди, келеекте мен урысларда катнасарман деп Рамберди ойламаган да болар. Аьли оларга уьйкен сеним.
– Кыйналаман, кайсы ана баласын ойламайды, тек согыста катнасып, аман-эсен келген атамнынъ йолын берсин, – деп тилеймен дейди Сыйлыхан Карасай кызы:
– Меним атам согыстынъ коьп кыйынлыгын коьрген, куьллелердинъ атылувыннан ян берген йолдасларын оьзи согыс майданлардан шыгарган. Согыс акында ол коьп хабарламайтаган эди. Себеби тек оьзине белгили. Тек Енъуьв куьнин коьзяслар ман йолыгатаган эди.
Эскеруьвлер, солар ман коьбиси яшайды, солар алдыга яшавды бардырмага да куьш береди. Аталардынъ асабалыгын толтырып турган уныкларга тек савлыкты эм енъуьв мен кайтканды йораймыз.
Буьгуьнлерде баьрине де авыр, тек урысларга увылларын йибергенлерге тувыл. Бирликте – куьшимиз!
Г.Сагиндикова,
РФ .Журналистлер союзынынъ агзасы.
Суьвретлерде: Уллы Аталык согысынынъ ветераны К.Заракаев; Р.Ораз- ниязовты йолга салув шагында анасы ман карындасы.
