Республикамыздынъ Тарумовка эм Ногай муниципаллык районларында Россия Армия сырасына 1-нши апрельде басланган аьскерге шакырув иси бу куьнлерде де бардырылады. Оьткен дуьйсемби куьн Тарумовка военкоматыннан графикке коьре Тарумовка эм Ногай районларыннан, сырасында 11 аьдем болып, призывниклердинъ кезекли куьби Республикалык йыйылув пунктына кетти. Эр йигитлерди аьскер сырасына йолга салув район етекшилерининъ, кардаш-тувганларынынъ эм тенъ-досларынынъ катнасувы ман Тарумовка авылынынъ маданият уьйининъ касындагы орталык майданында шатлыклы аьлде озгарылды.
Ясларга каратылган йылы соьзлери мен Тарумов район администрация аькимбасынынъ орынбасары Василий Джамалов шыгып соьйледи.
– Оьмирлер бойы Аталыкты коршалав аьр эр йигиттинъ, Россия гражданининъ киели борышы деп саналган. Кайсы ерге туьссенъиз де, эсинъизде болсын: асылы ман сиз кайдан, кайсы авыл, кайсы район ваькили экенинъизди. Эм сизинъ артынъызда – сизинъ ювыклар, кардаш-тувганлар, сиз – олардынъ сенимлиги. Яхшы йол эм ийги куллык этуьв сизге аьскер сырасында! – деп белгиледи ол.
Призывниклер алдында солай ок Тарумовка эм Ногай районларынынъ военкомы Александр Мельников шыгып соьйледи эм СВО оьтетаган ерге олар эм Россияга косылган республикадынъ срочная служба аьскершилери йиберилмеегин белгиледи.
– Эсинъизде болсын: тезден сиз алган аьскерлик ант – ол Аталыгымыздынъ сенимлигине ант. Ол – оьзлерининъ Конституционлык борышын толтырган атайларынъыз эм аталарынъыз алдында ант, ол – сиз бен оьктемсиеек сизинъ ата-аналарынъыз алдында ант, – деди А.Мельников.