Савлай дуныя йыл сайын коькек айынынъ 12-нши куьнинде космонавтика куьнин белгилейди. Бу куьн аьдемнинъ биринши кере космоска ушканына сый этилип беркитилген куьн деп саналады. Баслап космонавтика куьни СССР элинде белгиленген, аьлиги заманда Россияда эм алдынгы Совет Союзына кирген эллердинъ бир нешевинде байрамшыланады.

Биринши кере аьдемнинъ космоска ушувы 1961-нши йылдынъ коькек айынынъ 12-нши куьнинде болган. Сол аьдем – Смоленск областинде тувган совет космонавт-летчиги Юрий Гагарин, сонъында ол Совет Союзынынъ Баьтири, коьплеген патшалык баргыларынынъ иеси, Россиядынъ эм шет эллердинъ бир неше калалардынъ сыйлы гражданини болган. Солай ок Юрий Гагарин XX юзйыллыктынъ энъ де белгили аьдемлердинъ бириси болады, ол – космосты аьдем мен бойсындырувдынъ шынты белгиси. Ердинъ тоьгерегинде биринши кере орбита бойынша айланув 1 саьат 48 такыйкага созылган.
Байрам шара уьстимиздеги айдынъ 12-нши куьнинде Ногай район орталыгы Терекли-Мектеб авылында да озды. Сол куьн савлай элимиз бен Юрий Гагариннинъ космоска ушкан куьнининъ 60 йыллыгын белгиледик.
Шара Терекли-Мектеб авылдынъ Гагарин атындагы орамында озды. Орамнынъ басындагы уьйдинъ тамына КПРФ Ногай район комитети мен аьзирленген Юрий Гагариннинъ сыйына этилген такта илинген. «Ногайский район» МР администрациясы сол орамнынъ басына космонавтика куьнине багысланган баннер илген.
Кутлав соьзи мен шарада «Ногайский район» МР администрациясынынъ аькимбасынынъ орынбасары Б.Ярлыка- пов, КПРФ Ногай РК экинши секретари Ш.Мунгишиев, «Шоьл тавысы» республикалык газетасынынъ бас редакторы Э.Кожаева, Гагарин атындагы орамында коьплеген йыллардан бери яшайтаган ясуьйкенимиз Ф.Ярлыкапова соьйледилер. Ш.Мунгишиев ДАССР юзйыллыгына эстеликли медальлерди Фатима Ярлыкапова эм Эльмира Кожаевага тапшырды.
Гагарин атындагы орамы бойынша «Мен Гагарин орамында яшайман» деп аталып, флешмоб оьтти.
Г.Бекмуратова.
Суьвретте: Гагарин атындагы орамында шатлыклы оьзгеристен сонъ.