Макаламды Азиз Джумаевтинъ, оьз кесписин сайлай келип, алдына салган ниет-шакырувы ман, оьзи де сол шакырув астында беркип келетаган соьзлери мен атадым.
Менимше, эр кисиге болсын, кыскаяклыга болсын, баьтирлик абытка барувга йигерлик керек болады.
Баьтирлик деген анълам тынышлардан тувыл, кенъ анъламлы соьз деп те айтар эдим, ама сол исти толтырувга юрек эм туьп-тамырдан келген Тувган ерге алаллык керек. Сол йигерликтинъ де негизи – аьр аьдемнинъ ишки дуныясынынъ байлыгы. Бу касиет инсанда балалыктан алып уьйкен болганша туьзилип келеди деп айтпага да боламыз, сол баьрине де коьринмейди, ама тийисли ерде кулланылып, яшавга да шыгарылады. Мен тынышлы яшавда тувып-оьскен инсанлар несилиннен болганыма да, согыс, сонда этилген йигитликлер акында тек кинофильмлерден, китаплерден билемен. Сол инсанлыктынъ эм йигерли ислердинъ заманы болган.
Бу куьнлерде биз коьплеген алдышы спортсменлердинъ, йыравлардынъ эм сондай баскалардынъ атларын аьруьв билемиз, оькинишке, согыс майданларда йигитлерше ян бергенлердинъ атлары ашыкланмай калган ерлер де боладылар.
Тарихимиз Уллы Аталык, Афган, Шешен эм баска согысларды эсинде саклайды. Аьлиги заманларда Украина япсарларында болып турган специальли согыс операциясы да бир заман тарихке кетер, тек бу куьнлерде сонда енъуьвди ювыклатувда катнасатаган йигитлеримиздинъ атлары бизге бек сыйлы.
Лейтенант Азиз Джумаев, артиллерия батареясынынъ взвод етекшиси болып специальли согыс операциясында катнасады. Азиздинъ балалыгы да, яслыгы да Ногай район орталыгы Терекли-Мектеб авылында оьткен. Ол ерли А-Х. Джанибеков атындагы орта мектебин уьстинликли окып битиргеннен сонъ, оьзине яраган аьскерши кесписин алды. Азиз Санкт-Петербург каласындагы Михайловская аьскер-артиллериялык академиясында окып, кеспидинъ шайытламасын алады. Соьйтип, кеспили аьскерши Азиз Руслан увылы Джумаев ис аьрекетин Оренбург областининъ Тоцкое авылында дайымлык дислокация еринде баслайды. Ол ис аьрекетин баслаган заманларда Украина еринде специальли согыс операциясы юрип басланган заманлар эди. Екатеринбург каласында эки юма узагында аьзирлик курсларын оьткеннен сонъ, Азиз де элди коршалавга кетеди.
Артта тынышлы яшав, ойсыз яслык, йылув берген ата юрт… Азиз специальли согыс операциясында катнасып Донецк областинде баслады, оннан сонъ, Запорожьеге де бармага туьсти. Ызгы заманларда Луганская областин де коршалав – олардынъ куьбининъ борышы болды.
Специальли согыс операциясында Азиз Джумаев оьзининъ эр борышын шынты эр йигит кимик толтырады. Сонда болган бес ай ога яшавдынъ кыйынын да, тынышын да коьрмеге амал берди. Бу куьнлерде ол Россия Федерациясынынъ Коршалав министерствосынынъ приказы ман «За боевые отличия» деген коькирек белгиси мен савгаланган.
Сол онынъ ызгы савгасы тувыл экенине шекленмеймиз, алдыда Азизге тек уьстинликлерди, ден савлыкты йорайман. Оьз соьзимди Константин Рокоссовскийдинъ: «Аьскершиге энъ де уьйкен наьсип – эгер ол оьз элине явды енъуьвде ярдамласса эм элининъ эркинлигин якласа» дегени мен тамамлайман.
Г.Курганова.
Суьвретте: Азиз Джумаев.