Озган юма «Ногайский район» МР администрациясында мобилизация бойынша аьскершилик борышын толтырмага кеткенлерге эм олардынъ аьеллерине коьмек этуьв бойынша штабтынъ кенъеси оьтти. Мунда Ногай район администрациясынынъ Ямагат палатасынынъ председатели Эльмурза Саитов, район администрациясынынъ ваькиллери, муниципалитеттинъ Яшавшыларды социаллык яктан коршалав фондынынъ куллыкшылары эм баскалар ортакшылык эттилер.

Кенъесте «Яслык» яс-явка орталыгынынъ етекшиси Абибулла Шамбилов мобилизация бойынша аьскершилик борышын толтырувга кеткен Мурат Сариевтинъ анасы аьзирлеген аьризеди окыды. Сол аьризеде Боранбике Сариева увылына службасын бардырмага керекли затлар алмага карыж яктан коьмек тилейди. Кыскаяк- лыдынъ билдируьви мен, онынъ увылына йылы кийимлер, пауэр банк, «спальный мешок», азыклар йиберуьв керек.
Солай ок Абибулла Шамбилов мобилизация бойынша шакыртылган Рамберди Оразниязовтынъ анасы язган аьризеди де окып, йыйылганларга эситтирди. Кыскаяклы от ягатаган пешининъ туьтин шыгатаган трубасын авыстырув керегин билдиреди. Сонынъ уьшин 12 метр трубалар эм эки кап цемент керегин белгилейди.
Кенъесте онынъ катнасувшылары Боранбике Сариевага увылына керекли болган йылы кийимлер эм баска алатлар алар уьшин коьмекке 20 мынъ маьнет акша карыж шыгармага, Оразниязовларга от ягатаган пешин ярастырар уьшин 10 мынъ маьнет акша карыж шыгармага токтастылар.
Кенъесте «Ногайский район» МР администрациясынынъ «Финансовый отдел» МКУ етекшиси Арслан Кусегенов та шыгып соьйледи. Онынъ айтувы ман, согыс спецоперациясы озып турган ерде ян берген Амирхан Мурзагельдиев эм сес-хабарсыз йок болган Курбан Курбановтынъ ата-анасына 50 мынъ маьнет акшадан берилеек. Сонынъ уьшин Арслан Кусегенов ДР Финанслар министерствосына бу – аьли арамызда йок яслардынъ аьеллерине коьмек тилеп, хат язган эм онынъ тилеги кабыл этилинген.
Н.Кожаева.