Оьткен дуьйсемби куьн, 26-ншы сентябрьде, ДР Аькимбасы Сергей Меликовтынъ етекшилиги астында республика еринде толы болмаган мобилизацияды уйгынлав соравлары бойынша оперативли кенъес озгарылды.
Сергей Меликов кенъести ызгы куьнлердинъ энъ актуальли темасы – Дагестан еринде толы болмаган мобилизацияды Президенттинъ указына келисли озгарылмага кереги дегенге эс каратувды белгиледи.
– Оьткен юма ишинде мен сизинъ алдынъызга толы болмаган мобилизацияды Бас Главнокомандующийдинъ халкка каратылган шакырувындагы эм соны ман байланыслы указындагы маслагатларын каты тутув ман озгарув борышын салган эдим, ама мени баьри де анъламагандай коьринеди, – деди ол.
Сергей Меликовтынъ ойына коьре, буьгуьнде туьзилген аьллерде власть органлары, ямагат эм информация ресурслары биргелесип, бир фронт эсабында болмага кереклер. Ызгы куьнлерде орын тапкан оьзгерислер коьрсеткенлей, военкоматлар эм кайбир муниципалитетлер аькимбаслары ягыннан толы болмаган мобилизациясын уйгынлав шаралары артык эс каратылув ман озгарылмаган, сонынъ уьшин кайбир кыянатшылар туьркимлерде аьдемлер маьселелерин шешуьвге эп болган.
Соны ман байланыста Сергей Меликов, оьз соьзин ерли етекшилерге каратып: «Аьр аьдем элимизди оьз участогында коршаламага тийисли», – деди. Регион етекшиси ис орынлардагы аьдемлерге эм ямагат организацияларга мобилизацияды яклавшылардынъ йыйылув пунктларына келуьв, аьскершилер уьшин тийисли коьмек этуьв борышын салды.
Сергей Меликов белгилегенлей, повестка алмага деп военкоматларга оьз эрки мен келетаганлар да бар.
– Буьгуьн аьр етекши оьз орынында, керек болса, кеше-куьндиз де болмага, яшавшылар эм Тувган элимиз алдында оьз борышын толтырмага тийисли, – деди ол.
Дагестан етекшиси, солай ок военкоматларды мобилизация аьрекетин юритуьвде аьскерлик борышын толтырувга, сога келислигин тергемей, коьп аьдемлерди шакыртпага шалысатаганын критикалады.
Дагестан еринде мобилизациядынъ барысы акында билдируьвинде республикадынъ премьер-министри Рамазан Джафаров аьскершилерди борышын толтырувга тартув бар ресурслар эм аьскерлик-эсап кеспилер эсапка алынув ман военкоматлар бойынша уьлестирилгенин билдирди.
– Бу аьрекет барысы коьрсеткенлей, РФ Президентининъ эм ДР Аькимбасынынъ указларын толтырувга баьри де муниципалитетлерде бирдей, яваплылы эс каратпаганлар. Онынъ себеби сол: муниципалитетлер етекшилери эм военкоматлар ара тийисли биргелес аьрекет йок, солай ок яшавшылар ман анълатув куллыгы тийислисинше юритилмейди, – деди Р.Джафаров.
Соьйтип, республика еринде толы болмаган мобилизация бойынша уйгынлав соравлар ортага салынып каралды.
