Россиядынъ халк бирлигининъ куьни – патшалык байрамы эм сол байрам ортак енъуьвдинъ де белгиси тувыл, а дурысында, элимиздинъ халкларынынъ тыпаклыгын белгилейтаган куьн болады, неге десе сол куьн бирлескен халкка кырдан келген душпанды енъмеге амал берген. Орыс ерлерин явдан босатув уьшин ополчение сырасында орыс патшалыгына киретаган баьри туьрли миллет, дин эм класслар ваькиллери катнасканлар.
Бу байрам куьнинде биз халкка сондай маьнели тарих оьзгерислери, бизим коьпмиллетли элимиздинъ гражданларына тыпакласувдынъ баьри маьнелиги акында да айтпага борышлымыз. Айтылган байрам патшалык уьшин бек маьнели, неге десе ол Россия гражданларына тек бирлесип кайдай да бир оравлыкларды эм туьрли кыйынлыкларды енъмеге болувын эсине салады. Бизим патшалыгымыздынъ ерлеринде 195 халклардынъ ваькиллери яшайдылар эм олар туьрли дин йорыкларын тутадылар. Революцияга дейимги заманга усап, байрамнынъ бас борышы – ол туьрли динли, тукымлы эм асыллы аьдемлерди ортак бир ниетлерге, айтпага, гражданлар ара тынышлыкка етисуьвге бирлестируьв болады.
Халк бирлигининъ куьни Россия уьшин бек маьнели. Сол куьн элимиздинъ коьп миллетли гражданлары уьшин оьзлерин йымар бир халк этип сезбеге амал береди.
Бу байрам 4-нши ноябрьде белгиленуьви себепсиз тувыл. Сол куьн 1612-нши йылда элимиздинъ бас каласы Москва поляк интервентлериннен босатылган куьн болады. Сол йыл 4-нши ноябрьде нижегород воеводасы Козьма Мининнинъ эм князь Дмитрий Пожарскийдинъ етекшилиги мен халк ополчениеси Китай-калады колга алып, поляк армиясын сол куьн ок капитуляцияга кол бастырткан. Босаган калага биринши болып Кудай Анасынынъ Казан киели иконасы ман бирге Дмитрий Пожарский кирген. Сол икона, деп санаганлар сонъында Русьте, Москва патшалыгын поляк баскыншылыгыннан коршаламага ярдам эткен.
1625-нши йылда Дмитрий Пожарский Кудай Анасынынъ Казан иконасынынъ эм полякларды енъуьвдинъ сыйына оьз карыжлары ман Кызыл майданда агаш килсесин салган. Тастан ясалган аьлиги замандагы Казан Соборы болса сонъында, Москвага от туьскенде янып соьнген агаш килсединъ орынына, 1635-нши йылда курылады. 1649-ншы йылда патша Алексей Михайлович 4-нши ноябрьди патшалык байрамы – Кудай Анасынынъ Казан иконасынынъ куьни деп указын шыгарган. Бу байрамды Россияда 1917-нши йылдагы революцияга дейим белгилеп келгенлер.
Россия Президенти 2005-нши йылда Кудай Анасынынъ Казан иконасынынъ эм орыс армиясынынъ данъклы енъуьвининъ сыйына 4-нши ноябрьде янъы патшалык байрамын – Халк бирлигининъ куьнин токтастырув акында указга кол баскан.
Аьлиги заманда Россияда Халк бирлигининъ куьни йылдан-йылга абырайлы бола береди. Оьз Аталыгы, сонынъ бурынгысы эм буьгуьнгиси уьшин оьктемлик, эм Тувган Элининъ наьсипли келеектегиси уьшин сенимлик – мине не зат дайым да аьдемлерди татым этеди эм бирлестиреди.
Буьгуьнлерде элимиздинъ бойсынмаслыгы эм суверенитети уьшин юритилип турган специальлик согыс операциясы заманында бу байрамнынъ маьнеси боьтен де артады. Бизим душпанларымыз не деп айтса да эм бизди бузаяк болып кайдай куьш салса да, россия халклары оьзлери ара бирлигин берките берсе, бизди бирев де енъип болмаяк. Оьткен тарихимиз соны неше кере де шайытлап коьрсеткен.
Байрам ман байланыста баьри де газета окувшыларымызды эм ердеслеримизди йылы кутлаймыз! Аьр кимге де эмишликти, берк ден савлыкты, тил бирликти, яшавында эм исинде янъы уьстинликлерди, илгери оьрленуьвди йораймыз.
