Расул Гамзатовтынъ мерекеси – тек Дагестан Республикасы тувыл, савлай Россия элимиз уьшин маьнели оьзгерис. Бу данъклы шаирдинъ тувганлы 100 йыллыгына аьзирлик коьруьв эм соны ман байланыста байрамшылавды озгарув бойынша уйгынлав комитет туьзилип, онынъ Москвада оьткен биринши кенъесинде элимиздинъ басшысынынъ Указы ман келисте савлай йыл бойынша кайдай шаралар озгарылаягы белгиленген. Сол кенъесте ортакшылаган ДР-нынъ Информация эм баспа агентствосынынъ етекшиси Абдуразак Джамалутдинов сол оьзгериске бизим республикамыздынъ коьлем информация амаллары уьйкен маьне береегин белгилеген.
– Расул Гамзатов пан негизленип туьзилген аьдет-йорыклар буьгуьнге дейим сакланып бардырылады. Олар республикалык адабиат журналларда орын табадылар. 1951-нши йылда Расул Гамзатов, Дагестан Язувшылар союзынынъ председатели орынында бола турып, адабиат журналларды туьзуьв акында ниетленген. Онынъ ойы ман, оларсыз адабиат журналлар толысынша оьрленип болмаган. Соны ман миллет пресса структурасында Дагестаннынъ 6 тиллеринде шыгатаган «Литературный Дагестан» дуныя ярыгын коьрди. 1981-нши йылда солай ок халк шаирининъ баславы ман аьли 8 тиллерде шыгатаган «Лашын» балалар художестволык журналы негизленген, – деп анълаткан ол.
Сав дуныяга аты белгили зейинли шаирдинъ сыйлы мерекесин байрамшылав ман байланыста ДР-нынъ Информация эм баспа агентствосы ман оьткерилмеге планланган шаралар савлай Россия эм ювыктагы шет эллеринде де озгарылаяк. Айтпага, федераллык эм региональлик коьлем информация амалларынынъ журналистлери уьшин «Расул Гамзатовтынъ маданият асабалыгы» деген экспедиция уйгынланаяк. «Russia Today» телекомпаниясы ман халк шаирининъ яшавы эм яратувшылыгы акында документальлик фильм салынып, арабша эм английс тиллеринде коьрсетуьви планланган. Солай ок Расул Гамзатовка багысланып, «Россия» телеканалында эм региональлик телевидениесинде коьрсетуьв уьшин ВГТРК да фильм аьзирлеек.
Регионнынъ баспа тармагынынъ етекшисининъ белгилеви мен, 2023-нши йылда Расул Гамзатовтынъ калеми астыннан шыккан произведениелери 10 топлама – авар тилинде эм 10 топлама – орыс тилинде, «Расул Гамзатов. Замандасларынынъ эскеруьвлери» деген суьвретли йыйынтык, шаирдинъ афоризмлер йыйынтыгынынъ шыгарылувы планланган. Орташа алып каравга, Расул Гамзатовтынъ китаплери 30 мынънан артык экземпляр болып шыгарылаяк. Солай ок РГВК «Дагестан» телеканалынынъ эфиринде программалар арасында «Меним Расулым» деген роликлер коьрсетилип басланды, куьндегилик дуныя ярыгын коьретаган баспа шыгармалар бетлеринде «Расул Гамзатовтынъ тувганлы 100 йыллыгына» деген рубрика ашылган.
Республикамыздынъ коьлем информация амалларындагыдай болып, зейинли шаирдинъ тувганлы 100 йыллык мерекесининъ сыйына бизим «Шоьл тавысы» республикалык газетамыз бетлеринде де рубрика ашылды. Эндигиси биз сав йыл бойынша онынъ яшавы эм яратувшылыгы акында язып турув ниетимизди яшавга шыгармага суьемиз. Янъыларда газетамыз бетинде «Сыйлы мереке» деген рубрика астында Дагестаннынъ халк шаири Анварбек Култаевтинъ «Расул Гамзатов тувганлы – 100 йыл» деген макаласы, ногай шаири, РФ Язувшылар союзынынъ агзасы Гульфира Бекмуратовадынъ коьшируьвинде Расул Гамзатовтынъ «Ятыр эдим, оьлип ясыл оьзенде» деген ятлавы дуныя ярыгына шыгарылды.
Л.Уразаева.
