Ясуьйкенлер – бизим яшавымызды ярасыклайдылар, олардынъ акылбалыгы, бай яшав сулыбы, терен ойлы, акыллы маслагатлары бизге тувра яшав йолында адаспай бармага куьш береди.
Меним буьгуьнги хабарым да сыйлы ясуьйкенлеримиздинъ бириси – Салимет Аджимулла кызы Суендыкова акында. Салимет-абай янъыларда оьзининъ 80 йыллык мерекесин аьвлетлерининъ, балдан таьтли уныкларынынъ, немерелерининъ тоьгерегинде шатлыклы аьлде белгиледи.
Салимет Аджимулла кызы асылы ман Сарысу авылыннан, Аджимулла эм Айганнынъ аьелинде тувган. Салимет- абайдынъ бактысы оьз тенълериннен бир зат пан да баскаланмайды. Ол – авыр бактылы, кыйын йылларында тувган несилиннен. Ол алыс 1941-нши йылдынъ шилле айынынъ биринши куьнинде, Уллы Аталык согысы басланганда тувган. Кыз тувганын эситип, атасы бек суьйинди, ама куванышы коьпке созылмады. Оны Аталыкты кир ниетли душпаннан коршалав борышы согыска шакырды. 4 ясындагы кыз атасынынъ аьптесининъ кедеси Оьмирзак Амитовтынъ колында асыл болды. Ол буьгуьнлерде оьзининъ тувган ери, авылы, авылдаслары акында юрек йылувы ман эскереди. Ама согыстан сонъгы балалыгы акында эсине туьсирмеге коьп суьймейди.
Яслык шагында Салимет-абай Амет деген ногай яс пан танысады, араларында суьйим сезими тувып, эки яс бактыларын байлап, татым аьел курадылар.
Заман оьтип, олар Шешен Республикасындагы Шелков районынынъ 6-ншы номерли совхозында уьйкен аьеллердинъ бириси болдылар. 2 увылларын эм 5 кызларын тербиялап, тувра яшав йолына салдылар. Ети аьвлетти оьстирген кыскаяклы биринши дережели Аналыктынъ медалине тийисли этилген. Сав яшавларын Амет эм Салимет Суендыковлар малшылыкка багыслап келдилер. Эри бас койшы болып намыслы аьрекет этуьви мен авыл хозяйстволык тармагына уьйкен уьлисин косып келди. Социаллык базласларындагы бийик коьрсетимлери, эткен кыйыны коьп кере Сый грамоталар ман, медальлер мен белгиленген. 1985-нши йылда ВДНХ бас комитетининъ карары бойынша ийги иси уьшин бас койшы, ВДНХ выставкасынынъ катнасувшысы Амет Суендыковка баргы эсабында Москвич автокоьлиги де тапшырылган.
Салимет-абай дайым эрининъ онъ колы болып, оны ман кыйынды да, кувынышты да бирге боьлип келди. Ама Шешен Республикасында коьп йыллар артта юрген согыс оьзгерислери мен байланыста оларга тувган ериннен амалсыз кетпеге туьсти. Суендыковлардынъ аьели баслап Кумлы авылына, оннан сонъ Нефтекум районынынъ Коясыл авылына коьшеди. 2003-нши йыл аьел басы дуныядан кешти.
Буьгуьнлерде Салимет-абай кишкей увылы Солтанбек эм келини Элина ман Нефтекумск каласында яшайды.
Сыйлы ясуьйкенимизди мерекеси мен кутлап, ога берк ден савлык, коьп ийгиликлер, яхшылыклар сагынамыз! Аьвлетлеринъиздинъ, уныкларынъыздынъ, немерелеринъиздинъ дайым касында турып куьезин оьстирип келинъиз!
Г.Нурдинова.
Суьвретте: Салимет Суендыкова
