Биз куьн сайын йигитликлер коьрсетип, яс аркага ярык уьлги болып келген йигитлеримиз бен бек оьктемсиймиз. Сондай ясларымыздынъ бириси болган Бабаюрт районынынъ Тамазатюбе авылыннан летчик Зайнудин Шарабдинович Мажидов. Тамазатюбе орта мектебинде окыган йылларында, билимге аваслыгы болган ястынъ коьк куьмпезинде ушпага уьйкен мырады болган. Ата-анасы ястынъ летчик боламан деген ойын унамадылар.
Ерли мектебти етимисли тамамлаган яс 1970-нши йыл Дагестаннынъ патшалык университетининъ физический боьлигине туьседи. Бала шактан летчик болаякпан деген мырады соьнмей, боьтен де оьркен атып, оьрленип келди. Яс ДГУ-дынъ 3-нши курсыннан кетип, ата-анасынынъ разылык бермегенине де карамай, Армавир каласына йол алды. Онынъ бала шактан суьйген кесписине йол ашылды, ол Армавир каласындагы йогары авиация летчиклер училищесине туьседи. Ястынъ юрек туьбинде бала шактан эткен мырады, ойы яшавга айланды. Ол окувга савлай киристи. ДГУ-да алган билимлери де оьз коьмегин эттилер.
Заманы болганда, уьйине, досларына хатлар язды, авылдынъ эмишлигин билди. Язда Зайнудин окувыннан тыншаювга келсе, уьйдегилери бек суьйинетаган эдилер. Келген конаклар курсант кийиминдеги яска оьктемсип карайтаган эдилер. Атасы ясты тек колында аьскерши-летчигининъ шайытламасы ман келгенде кеширеди.
Окувды тамамлаган сонъ, яс Туркестан аьскерлик округында службасын оьтеди. Ол СССР кубыла межелерин коршалап келген. Яс службасын, звено етекшиси болып, Ашхабад каласынынъ кубыла-куьнбатар бетинде орынласкан Ак-Тепе авылында оьтти. Ол яс лейтенант летчиклерин аьскершилик ушув усталыгына уьйретип келди. 1980-1983-нши йыл дуныяда аьл осалланып басланувы ман байланыста, элимиздинъ йогары политикалык етекшилеви мен Зайнудин службасын оьткен эскадрильяды Чехословакиядагы аьскердинъ орталык куьбине коьширмеге токтас алынды. Полк разведкасынынъ етекшиси болган Зайнудиннинъ алдында бек яваплы эм маьнели борышлар салындылар. Ол службасы бойынша МиГ-23М истребитель самолетында ушып, Варшава келисуьвлиги бойынша бирлескен эллерининъ межелерин янаса ушкан НАТО эллерининъ самолетларыннан коршалап келген. 1988-нши йылга дейим ол Варшава келисуьви бойынша бирлескен эллерининъ кавыфсызлыгын канагатлады. Оннан сонъ ясты Белорусь аьскерлик округына коьширедилер. Энди ол элимиздинъ куьнбатар межелерин коршалап келди. СССР бузылып баславы ман Зайнудин кызмет эткен авиационлык полкы боьлинди. Майор, 1-нши класс летчик-истребители Зайнудин Мажидовка Белоруссиядынъ баска авиация полкына коьшпеге маслагат бердилер, ама ол СССР Согыс-ава куьшлерининъ сырасыннан запаска кетпеге токтасты. Ол тувган ерине кайтты. Летчик-инспекторы болып, ол Махачкаладагы ДОСААФ авиаспорт клубында летчик спортсменлерин, курсантларды аьзирлеп баслайды. Оннан сонъ 21-нши номерли кеспили техникалык училищесинде ясларды, кызларды баслангыш аьскерлик аьзирлигине эм яшав аьрекетининъ кавыфсызлыгынынъ негизине уьйретип келеди. Ис аьрекетинде коьрсеткен етимислери уьшин офицер Мажидов Дагестан Республикасынынъ билимлендируьвининъ отличниги деген омырав белгисине де тийисли этилген.
Узын эм наьсипли яшав йолын оьткен ян косагы Райганат пан Зайнудин эки сылув кызларын оьстирип, тувра яшав йолына салдылар. Зайнудин Мажидов арамыздан кеткенли он йыллардан артык болады. Онынъ Эли уьшин эткен яваплы эм коьримли иси ясларымызга дайым ийги коьрим, эстелик болып келеек.
Г.Рамазанова.
Суьвретте: Зайнудин Мажидов.
