Мен Уллы Енъуьвдинъ 77-нши йыллыгы алдында оьзимнинъ уьйкен атайым, согыс йылларынынъ авыр йолларын оьткен фронт катнасувшы Мустафа Карагулович Карагулов акында хабарламага суьемен.
Муннан коьп-коьп йыллар артта яс заманларында атайым Мустафа Карагулов кабардин миллетли яс кыз, меним уьйкен тетем Гулькизар Карагулова ман бас косып, аьел курады. Олар уьйленгеннен сонъ, бир неше айлар озып-озбай, Уллы Аталык согысы басланады, эм, атайым, коьплеген баска аьскершилердей болып, Элимизди явдан коршалавга турганлар сырасында фронтка кетеди. Меним тетем ян косагын бек суьетаган эм сагынатаган эди, аьр куьн Кудайдан онынъ давдан сав-саламат болып келгенин тилеп турган. Эм мине не аьлемет: атайымнан тетемге соьйтип куьткен хат келеди. Онда атайым бир неше куьнлерден Моздок каласына келееги акында билдирип, олардынъ сонда келуьвин куьтетаганын айтады. Суьйиниши койынына сыймай, тетем сол ийги хабарды онынъ ата-анасына билдируьв ниети мен оларга шавып барады. Бу хабар баьрин де суьйинтеди, эм олар атайым ман йолыгысувга деп йолга шыкпага аьзирлик коьредилер, тек атайымнынъ анасы авырувы ман байланыслы олар ман бара алмайды.
Эм мине кайынатасы келини мен шанага минип, Моздок каласына карап йол аладылар. Йолда олар, бир зат та коьринместей ел эсип, кар борап, уьш куьн юредилер. Моздок каласына келип, оны коьреек болып аьли эки куьн турадылар. Сол куьнлер бойы да кар явып, боран эседи. Авыр эм сувык кыс аьллеринде сол шаклы заман атайымды куьтип турып, кайынатасы эртенъги шакта келини аяз сувыклыгыннан ян бергенин сезеди. Соьйтип , атайым Мустафа ман йолыгысалмайды, неге десе ол йолдаслары ман бирге мунда есирге алынган болган. Мунда олар, душпанлар ягыннан этилинген коьплеген эзиетлевлерге шыдап, уллы элимиздинъ шынты патриотлары болып, тувган ерин, оьз халкын сатпадылар.
Давдан кайтып келгеннен сонъ, Мустафа атайым ян косагынынъ соьйтип дуныядан тайганына ынана алмай, коьпке дейим кайгыга коьмилип турды, ама бир де онынъ акында мутпаган, ол онынъ юрек туьбинде дайым да болган.
Дженнет Карагулова,
6-ншы «а» класс окувшысы (Карагас авылы).
