Яшавда баьтирликке ер бар. Бу соьзлерди тез-тез эситемиз эм айтамыз. Элге явлар шапкынлык этсе, эр кисилер бирдей болып, коршалавга турадылар. Соьйтип, Уллы Аталык согысы заманда аталарымыз йигитлерше согысып, данъклы болып, Енъуьвди аькелгенлер. Сол каты согысувларда меним ердеслерим, Уьйсалган авыл яшавшылары да катнасканлар. Солардынъ арасында Байрамовлардынъ тукымы да бар. Давдан кайтпаганлардынъ эсине авыл мектебининъ азбарында эстелик салынган, бир аьелден тек бирев тувыл кетип кайтпаганлар. Соьйтип, Байрамовлардынъ аьелиннен уьш аьдемнинъ тукымы язылган эстеликте. Уллы Енъуьвди де коьрип, коьплеген йыллар тынышлыкта яшаган ветеранларымыздынъ сырасында Абдулкерим Байрамов та бар эди. Меним эсимде, Байрамовлар авылдынъ шетинде туратаган эди, мени мен тенъ балалары да бар, балалар бавына олардынъ увылы Алиян ман юретаган эдим. Сонъында баьримиз де оьсип, шашырадык элимиздинъ туьрли ерлеринде.
Алимеджан Байрамов Воронеж областинде аьели мен яшайды, авылга келген заманлары да болатагандыр, аьлиги заманда бирев биревди коьрмейди, заман да ушады, биз де ювырамыз онынъ артыннан. Янъыларда авылга кайгылы хабар келди, баьримиздинъ де юреклеримизди ашытты. Бизим ердесимиз Арифулла Алимеджан увылы Байрамов Украина еринде специальли операциясында катнасып, йигитлерше согысып, оьз яшавын курманлык эткен.
Арифулла Воронеж областининъ Павлов районынынъ Гаврильск авылында 1993-нши йылдынъ кырк кийик айынынъ 28-нши куьнинде тувган. Сонда орта мектебин битирген, 2011-нши йылдынъ караша айында эр борышын толтырмага шакыртылган. Арифулла десант аьскерлеринде куллык эткен эм болжал еткенде, сол ерде контракт бойынша куллык этип баслайды, оьз Аталыгын коршалайды.
Арифулла йолдаслары арасында оьз йигерлиги мен, алал дослыгы ман белгили эди. 2014-нши йыл ол Украинада согысувларда катнасады, сонъында миротворец болып, Сирияга кетеди. Арифуллады таныганлар оны тек ийги касиетли эр киси деп айтадылар. Ол урысувлардынъ янып турган еринде согысатаган болган, явды аямаган. Арифулла коьрсеткен йигитлиги уьшин 2014-нши йыл Суворов ордени эм «Крымды босатув уьшин» медали мен савгаланган. 2021-нши йыл яс ердесимизге «Сирияда озгарылган специальли операцияда катнасканы уьшин» медаль тапшырылган.
Оькинишке, яс баьтиримиздинъ юреги токтады. 2022-нши йылдынъ навруз айында Украина еринде Киев областининъ Дмитровка авылында атылувдан алынган яралардан Арифулла Байрамов ян берген. Оьз борышын йигит баьтирлерше толтырды. Арифуллага Йигитлик ордени тапшырылган (оьлгеннен сонъ).
Ашытады юрек, ама баска яктан юрегим кайдай уллы оьктемликке толады. Меним авылымнынъ йигитлери оьзлерининъ ийги деген касиетлерин коьрсетедилер, олар баскалар тынышлыкта яшасын деп яшавларын курманлык этедилер.
Арифулладан сонъ тек йигитлик данъкы тувыл, эки кишкей увыллары калды. Ата-анасына, аьлейине буьгуьнлерде айлак та кыйын. Олар ман косылып биз де кыйланамыз.
Оьтер заман, келеекте Арифулладынъ аты тек Байрамовлардынъ аьелинде тувыл, савлай ногай халкымыздынъ эсинде сакланар дайымларга. Увыллары Андрей эм Темирлан оьсип, атасынынъ атын ерге туьсирмей, йигерли йигитлер болып оьсер деп шекленмеймиз. Мен Байрамовлардынъ аьелине, савлай авылыма бассавлык йорап, калганларга ден савлык эм сондай кайгыды оьтпеге куьш тилеймен.
Г.Бекмуратова.
Суьвретте: А.Байрамов.
