Янъыларда Ногай район япсарында ерлестирилген А.Тахо-Годи атындагы музейининъ филиалында, Россия тарихинде болып озган бир неше оьзгериске катнаслыгы бар аьдемлер конакка шакырылып, бир аьлемет кызыклы йолыгыс озгарылды.
Сол оьзгерислерге катнаслыгы бар аьдемлер йолыгысы, деп айтувымыз сол: бу куьн, мунда музей куллыкшылары етекшиси, Дагестан Республикасынынъ ат казанган маданият куллыкшысы Каирбек Бальгишиев пен Ногай район Хатын-кызлар советининъ председатели Асият Манкаева ман биргелесип уйгынланган шарага Уллы Аталык согысы озган йылларга балалыгы келген, согыс катнасувшыларынынъ балалары, караклар колларыннан ян берген ыхтыяр саклавшы органынынъ куллыкшысынынъ тул хатыны, ызгы заманларда Украина япсарларында оьтип турган согыс спецоперациясынынъ катнасувшыларынынъ анасы эм хатыны, Ногай районынынъ прокурорынынъ орынбасары С.Абдуллаев, Ногай районында ерлескен аьскер боьлигининъ ваькили Д.Никитин ортакшылык эттилер. Оларга бу куьн С.Батыров атындагы саниятлар мектебининъ тербияланувшылары (окытувшысы М.Курганова) ятлавлар айтып, оьз оьнерлерин коьрсеттилер.
Кешликти Асият Бадиевна ашты эм юритти. Баслапкы соьз Ногай район прокуратура куллыкшысына берилди. Ол болса, келген конакларга, балаларга, оьзининъ кеспилик борышына коьре, аьли бизим ямагат кайдай кыянатлыклар ман йолыгысатаганын айтып, терроризм мен биргелес куьрес юритуьв акында билдирип кетти.
«Яшаймыз эм эсимизде саклаймыз» деп аталган кешликти саниятлар мектебининъ окувшылары бардырдылар. Согыс йылларындагы яшав акында сол йылларга балалыгы келген Эсенбике Туркменбаева хабарлап кетти.
Оьзининъ анасынынъ соьзин бардыра келип, Ногай патшалык оркестрининъ артисти Арслан Туркменбаев «Анама» деген йырын йырлап кетти. Бу куьн мунда келген конаклар – Уллы Аталык согысынынъ катнасувшыларынынъ увыллары ман кызлары: Шатемир Мунгишиев, Абрек-Заур Лукманов, Румия Оразбаева, Софья Батырова, Гульфира Койлакаева оьзлерининъ аталарынынъ акында хабарладылар. Террористлик акт бойынша ян берген Эльдар Аджигельдиевтинъ хатыны Камиля, СВО катнасувшысы Алавдин Салыкаевтинъ анасы Райме Салыкаева эм СВО катнасувшысы Кайту Оразбаевтинъ хатыны Зарема Байманбетова да соьз алдылар. Оьзининъ ис аьрекети акында аьскер боьлигининъ ваькили Дмитрий Никитин де хабарлады. Оьз соьзинде ол аталарынынъ – Уллы Аталык согысында катнасувы акында эскерди.
Ногай район Ветеранлар советининъ председатели Акманбет Сангишиев бу куьнлерде аталардынъ асабалыгын саклар уьшин кайдай куллыклар этилетаганы акында эм аьли де СВО катнасувшыларын колтыклав уьшин кайдай куллыклар этпеге ниети барын билдирди. Шара Арслан Туркменбаевтинъ согыс темасына йырларын йырлавы ман тоьгерек сыпырадынъ касында дослык шай ишуьви мен тамамланды.
Бу йолыгыс, меним ойымша, бек уьйкен маьнели, неге десе, оьсип келеяткан несил сондай йолыгысларда ортакшылык этип, оьз билимлерин кенъейтедилер, эм сол армаганда патриотлык сезимлер оьстируьвге ярдам этеди.
Г.Курганова.
Суьвретте: С.Батыров атындагы саният мектебининъ театраллык куьбининъ тербияланувшысы.