24-нши май айында «Шоьл тавысы» республикалык газетасынынъ бас редакторы Эльмира Кожаева, журналистлери Гульфира Бекмуратова, Галима Курганова эм Магомет-Али Ханов Махачкаладагы «Россия – меним тарихим» деген Тарих паркында Расул Гамзатовтынъ йылына багысланып оьткен «Инфорум» билимлендируьв шарасында ортакшылык эттилер.
Форум РФ Журналистлер союзынынъ аьрекети эм ДР Информация эм баспа агентствосынынъ колтыклавы ман уйгынланды. Сонынъ куллыгында ДР Оькиметининъ вице-премьери Рамазан Джафаров, РФ Журналистлер союзынынъ председатели Владимир Соловьев, ДР Информация эм баспа агентствосынынъ етекшиси Абдуразак Джамалутдинов, республикалык эм федераллык СМИ журналистлери, Дагестаннынъ муниципалитетлерининъ эм ведомстволарынынъ пресс-службаларынынъ куллыкшылары, власть органларынынъ эм ямагат организацияларынынъ ваькиллери катнастылар.
Шарады баслаятып, Рамазан Джафаров сонынъ катнасувшыларын Дагестан Аькимбасы Сергей Меликовтынъ атыннан саламлады. Ол солай ок йыйылганларды РФ Журналистлер союзынынъ председатели В.Соловьев пан таныстырды эм ога бу шарага келгени уьшин разылык билдирди.
ДР Оькиметининъ Председателининъ орынбасарынынъ айтувы ман, Расул Гамзатов баьри россиянлылар уьшин яркын коьрим болып калады, онынъ яратувшылыгы элимиздинъ кырында да белгили.
Владимир Соловьев болса оьз соьзин оьткен 90-ншы йылларда Дагестанга биринши кере келгени акында йылы эскеруьвлерден баслады. «Дагестан – ол уьйкен коьпмиллетли республика эм мунда хыйлы кызыклы коьлем информация амаллары орынласкан. Россия Журналистлер союзы оьткеретаган баьри де проектлерде, форумларда, фестивальлерде дагестан журналистлери де катнасканы бек маьнели», – деди ол.
Соловьевтинъ айтувы ман, аьлиги заманларда журналистлер информационлык фронтынынъ аьскершилери болып токтаганлар.
«Бизим элимизге карсы тарихте бир де болмаган информационлык согысы юритиледи. Согыс спецпропагандасынынъ энъ куьшли специалистлери буьгуьнлерде бизим ямагатымыздынъ психологиялык аьллерин бузбага, ямагат ишине боьлинуьв, сол ок заманда миллетлер ара давласувлар салмага шалысадылар. Оларга баьри куьшлеримизди бирлестирип карсылык этпеге борышлымыз. Сол куьрестинъ алды сырасында – журналистлер, солардынъ сырасында регионаллык журналистлери, аьр ким оьз еринде болганы маьнели. Соны ман бирге журналистлер оьз билим оьлшемин аьр заман да арттырып бармага тийисли», – деп белгиледи РФ Журналистлер союзынынъ басшысы.
Муннан сонъ В.Соловьев республика СМИ ваькиллерининъ соравларына яваплады.
«Янъы медиа оьрленуьв институты» АНО етекшиси Мухтар Амиров уллы дагестан поэтининъ оьнер асабалыгына багысланган, «Бизим Расул» деп аталган сайтты презентациялады. Сол порталда шаирдинъ шыгармаларынынъ толы архиви, суьвретлер галереясы, онынъ мерекесине багысланган байрам шаралары акында янъылыклар орын табаяклар.
Форумда «Дагестан Республикасынынъ ат казанган журналисти» деген сыйлы ат бир неше республикалык газеталарынынъ журналистлерине тапшырылды. Россия Журналистлер союзынынъ етекшиси В.Соловьев болса Дагестан Аькимбасы атыннан байыр саьат пен савгаланды.
Шарадынъ «Регалиясыз хабарласув: СВО, фейклер эм медиасогыслар» деп аталган темасы бойынша «Россия-24» телеканалы уьшин Россия калалары эм СНГ бойынша информация йыйыстырув начальниги Виталий Арутюнян шыгып соьйледи.
РФ Журналистлер союзынынъ халклар ара боьлигининъ секретарь-етекшиси, журналист-международник, «Антифейк» программасынынъ дайымлык эксперти (Биринши телеканал) Тимур Шафир «СВО акында хабарлаймыз» деген форумнынъ кезекли кезегин юритти. Сонда Дагестанда тувып оьскен, буьгуьнлерде согыс хабаршылары, оьз янларын аямай, СВО зонасыннан керекли янъылыклар аьзирлейтаган НТВ-дан – Омар Магомедов, Биринши телеканалдан – Гусейн Гусейнов, Низами Гаджибалаев, медиатехнолог Исрафил Исрафилов хабарладылар.
Форумда лекциялар окылды, мастер-класслар, дискуссиялар эм тагы да баска маьнели шаралар оьткерилди.
М.Ханов.
Суьвретте: шарадан коьринис.
