Уьстимиздеги йылдынъ коькек айынынъ 17-нши куьниннен алып 19-ншы куьнине дейим Дагестан Республикасынынъ Аькимбасынынъ кесек заманга куллыгын юритуьвши Сергей Меликов бир неше министрлер эм ведомстволар етекшилери мен савлай Кубыла Дагестанды айланып шыкты.

Сергей Меликов Кубыла Дагестаннынъ баьри калаларында эм авылларында болып, ерлеринде бар маьселелери мен танысты. Ерли больницаларды, мектеблерди, балалар бавларын карап шыкты. Бавлар ман, юзим шашылган ерлерди де коьрмей озбады, аьр бир болган ердеги яшавшылар ман да хабарлап кетти.
Меним ойыма коьре, Сергей Меликовтан баска регионлардынъ етекшилерине де коьрим алып, оьз регионларындагы калаларга, авылларга барып, оьз коьзи мен курылатаган объектлерди коьрмеге, яшавшылардынъ маьселелери мен таныспага болаяк. Сергей Алимович бу эткен иси мен оьзининъ дагестанлыларынынъ алдында кайдай яваплылыкты сезетаганын коьрсетти. Солай ок, бу кыдырувы ман ол Кубыла Дагестаннынъ аьр бир ерининъ ярасыклыгын коьрди.
Дагестан Республикасы оьзининъ ярасык табиаты ман коьплерге таныс, мунда – таза ава, неше туьрли авырувлардан эм болган булаклар ман йылгалар. Аьр бир ер конакларды хош коьрип алып, сейирсиндирмеге болады. Дагестаннынъ халкларыша – оьз аьдетлери мен, маданияты ман эм тарихи мен баскаланады. Дагестан Республикасынынъ Аькимбасынынъ кесек заманга куллыгын юритуьвши бу кыдырувында туьрли миллетли аьдемлер мен хабарлады. Ол республикадынъ энъ де кувыс ерлеринде орынласкан авылларында болды. Сол зат эки якка да (халкка да, ДР Аькимбасынынъ кесек заманга куллыгын юритуьвшиге де) бек маьнели эди.
Бу йолыгыс власть пен халк араларында ийги коьпирди салды, байланысты беркитти. Эндигиден армаган сол байланыс тек беркип барар деп бек сенемен.
Сергей Меликовтынъ алдында – Орта эм Сырт Дагестан ман танысув. Мен ога ден савлыкты эм бизим суьйикли Дагестанымызга онъайлыкларды йорайман.
Эльмира Кожаева,
«Шоьл тавысы» газетасынынъ бас редакторы.