Дагестан Аькимбасы Сергей Меликов республика парламентининъ кезекли сессиясында Дагестанда энергетика куваты етиспейтаганы эм сол себептен регионнынъ электричество яктан керексинуьвлери барлыгын айтып белгилеген.

Бу маьселеди шешуьв уьшин былтырдан алып Южно-Сухокумск каласында 15 МВт оьлшемли куваты болган куьн ярыгы ман ислейтаган электростанция курылысы басланган. Сондай электростанцияларды солай ок Дербент эм Ногай районы ерлеринде де курув уьшин буьгуьнлерде тийисли куллыклар юритиледи.
Белгиленген маьселе мен байланыста Ногай район Ямагат палатасынынъ председатели Эльмурза Саитов оьз ойын айтып билдирген.
– Дагестан Аькимбасы Сергей Меликовтынъ эм республика Оькиметининъ регионда, сонынъ эсабында бизим Ногай районы еринде куьн ярыгы ман ислейтаган электростанциялар курылысынынъ проектин яшавга шыгарувы бойынша аьрекетин толы кепте макул коьремен. Республика етекшиси оьзининъ докладында регионга байыр энергетика тармакларын курув кереги акында дурыс кепте айтып белгилеген.
Бириншилей, сондай электростанциялар республикамыздынъ эм Ногай районымыздынъ авылларын электроярык пан иркуьвсиз канагатлаяклар. Буьгуьнлерде биз, республика яшавшылары, сол маьселе мен байланыста электроярыктынъ йыйы соьнуьвин эм етиспевин коьрмей болмаймыз.
Экиншилей, янъы электростанциялар курылысы янъы ис орынларын туьзеек, ол зат онлаган аьеллерди куллык эм кыйын ак пан канагатлаяк.
Уьшиншилей, айтылган проекттинъ яшавга шыгарылувы район бюджетине косымша карыжлар эсабында туьсеек янъы налоглар эм солар муниципалитеттинъ армаган социал-экономикалык оьрленуьви уьшин кулланылаяк, – деген Эльмурза Саитов газетамыздынъ хабаршысына.