Быйылгы биринши аппарат кенъеси Ногай район администрациясынынъ аькимбасы Джамалутдин Эсиргеповтынъ район активин янъы басланган 2023-нши йыл ман кутлавы ман басланды.
Кенъесте солай ок район басшысынынъ орынбасарлары Хамидулла Саитов пан Баймагомед Ярлыкапов, авыл аькимбаслары, район организация эм учреждение етекшилери катнастылар.
Д.Эсиргепов Ногай РЭС энергетиклерининъ кешеси-куьни иркуьвсиз ис аьрекети аркасы ман янъыларда болып оьткен каты елли куьнлерди район еринде авариясыз-несиз оьткермеге амал табылганын белгиледи. Район етекшиси оьз ис борышларын намыслы толтыратаганы уьшин РЭС начальниги Р. Муслимовка, энергетиклер А. Кульчимаевке, А. Агисовка, А. Джумагишиевке, М. Османовка, М. Аджигельдиевке Разылык хатларын тапшырды.
Кенъесте «Ногай Эл» ФНКА фонды атыннан Сый грамоталар патшалык ногай драма театрынынъ басшысы Б.Джумакаевке, «Айланай» ансамблининъ етекшиси М.Ваисовка, ногай саз алатлар оркестрининъ бас дирижеры Б.Кудайбердиевке, предприниматель Б.Бийбулатовка эм баскаларга да берилди.
Д.Эсиргепов шатлыклы аьлде район администрациясынынъ «Экономика эм уйгынлав-проект оьрленуьв боьлиги» МКУ начальнигинъ куллыгын юритуьвши С.Сагиндиковага «Дагестан Республикасынынъ ат казанган муниципаллык куллыкшысы» деген аттынъ шайытламасын тапшырды.
Район аькимбасы Бельгиядынъ король гильдиясы атыннан белгили ногай суьвретшиси, этнограф С.Батыровтынъ оьнерине багысланган выставкаларды Брюссель эм Парижде оьткермеге ярдам эткени уьшин «Шоьл тавысы» республикалык газетасынынъ бас редакторы Э.Кожаевага С.Батыровтынъ акында фильм аьзирлегени уьшин, фотосуьвретши В.Уразакаев пен С.Батыров атындагы фонд басшысы Е.Уразакаевага эм баскаларга каратылган Разылык хатты окыды.
Муннан сонъ кенъестинъ куьн йосыгындагы баслапкы 2022-нши йылда билимлендируьв тармагында ярдам этуьвдинъ йорыкларынынъ сапатына биревге де бойсынмайтаган белги беруьвди оьткеруьвдинъ сырагылары акында сорав бойынша район билимлендируьв боьлигининъ начальниги А.Агаспарова, «Халк оьнерининъ эм маданият оьрленуьвининъ орталыгы» МКУ озган йылда оьткерген шаралары акында сонынъ директоры С.Караянов шыгып соьйледилер.
Кенъестинъ ызында Д.Эсиргепов баьри де етекшилерге оьз коллективлеринде уьйшиликтеги кокысларды йорыксыз таслав бойынша тербиялав исин юритпеге маслагат этти.
